చంద్రమోహన్! ఇవేం మాటలు?: తమ్మారెడ్డి

హైదరాబాద్: గోల్డ్ క్వెస్ట్ వ్యవహారంపై సినీ నటుడు చంద్రమోహన్ అసందర్భ వ్యాఖ్యలు చేశారని నిర్మాతల మండలి అధ్యక్షుడు తమ్మారెడ్డి భరద్వాజ అన్నారు. సినీ పరిశ్రమలో దొంగలున్నారని చంద్రమోహన్ చేసిన వ్యాఖ్యపై ఆయన తీవ్రంగా ప్రతిస్పందించారు. చంద్రమోహన్ అలాంటి వ్యాఖ్యలు చేసి ఉండాల్సింది కాదని ఆయన మంగళవారం మీడియా ప్రతినిధులతో అన్నారు. సినీ పరిశ్రమలో మోసాలు చేసినవారిపై చర్యలు తీసుకున్నామని ఆయన అన్నారు. గోల్డ్ క్వెస్ట్ పై మీడియా అతిగా ప్రతిస్పందించిందని, కనీసం తమను సంప్రదించకుండానే వార్తాకథనాలు ప్రచురించిందని ఆయన అన్నారు. తప్పులు అంతటా జరుగుతుంటాయని ఆయన అన్నారు.

సినీ రంగం నదిలాంటిదని, ఎందరో వస్తుంటారు పోతుంటారని ఆయన అన్నారు. అవసరాలు తీర్చుకోవడానికి సినీ రంగంలోకి వస్తున్నవారు నిలకడగా సినిమాలు తీయడం లేదని ఆయన అన్నారు. కొన్ని సినిమాలకు పోస్టర్ల ఖర్చులు కూడా రావడం లేదని ఆయన అన్నారు. రియల్ ఎస్టేట్ వ్యాపారులు సినీ రంగానికి వస్తుండవచ్చునని, అయితే వారు నిలకడగా సినిమాలు తీయడం లేదని ఆయన అన్నారు. వీలైతే చంద్రమోహన్ పై చర్య తీసుకునే విషయాన్ని ఆలోచిస్తామని ఆయన అన్నారు. విదేశాలకు వెళ్లే మోజులో పరిశ్రమను ఇతరులు ఆశ్రయించే అవకాశం ఉందని, ఇటువంటి వారి పట్ల అప్రమత్తంగా ఉండడం అవసరమని ఆయన అన్నారు. మీడియా సహకరిస్తే అవకతవకలను అరికట్టగలమని ఆయన చెప్పారు.