కడపకు వెళ్లదు: పురంధరేశ్వరి

విశాఖపట్నం: కేంద్రీయ విశ్వవిద్యాలయాన్ని కడప జిల్లాకు తరలించబోమని కేంద్ర మానవ వనరుల శాఖ మంత్రి దగ్గుబాటి పురంధరేశ్వరి చెప్పారు. కేంద్రీయ విశ్వవిద్యాలయం విశాఖపట్నంలోనే ఏర్పాటవుతుందని ఆమె చెప్పారు. ఎన్టీఆర్ జయంతి సందర్భంగా ఆమె బుధవారం విశాఖపట్నంలో కృష్ణుడి రూపంలోని ఎన్టీఆర్ విగ్రాహాన్ని ఆవిష్కరించారు. దేవుడి రూపంలో ఎన్టీఆర్ విగ్రహాన్ని ఏర్పాటు చేయడాన్ని భారతీయ జనతా పార్టీ (బిజెపి) వ్యతిరేకించింది. ఈ మేరకు పురంధరేశ్వరికి బిజెపి నాయకులు వినతి పత్రం సమర్పించారు.

రాష్ట్రానికి ఐఐఎం రాదని ఆమె స్పష్టం చేశారు. అయితే ఇనిస్టిట్యూట్ ఆఫ్ ప్లానింగ్ అండ్ ఆర్కిటెక్చర్ మాత్రం విజయవాడలో ఏర్పాటవుతుందని ఆమె చెప్పారు. ఈ సంస్థ ఏర్పాటుకు భూమి ఉందని రాష్ట్ర ప్రభుత్వం చెబుతోందని, ఆ భూమిని కేంద్ర కమిటీ సందర్శించాల్సి ఉందని ఆమె చెప్పారు. కమిటీ చూసి నివేదిక ఇచ్చిన తర్వాత నిర్మాణం మొదలవుతుందని ఆమె చెప్పారు.