బిజెపి కసరత్తు: గాంధీనగర్ నుంచి అద్వానీ

న్యూఢిల్లీ: వచ్చే లోకసభ ఎన్నికలకు భారతీయ జనతా పార్టీ (బిజెపి) తొలి విడత అభ్యర్థుల జాబితాను విడుదల చేసింది. ఆరు లోకసభ నియోజకవర్గాలకు గురువారం అభ్యర్థులను ఖరారు చేసి వెల్లడించింది. సీనియర్ నాయకుడు, ప్రధాని అభ్యర్థి ఎల్.కె. అద్వానీ గుజరాత్ లోని గాంధీనగర్ నియోజకవర్గం నుంచి పోటీ చేస్తారు. ఈ జాబితా వెల్లడితో తాము ముందస్తు ఎన్నికలకు సిద్ధంగా ఉన్నామని బిజెపి తెలియజేసినట్లయింది.

నవజోత్ సింగ్ సిద్ధు (అమృతసర్), వినోద్ ఖన్నా (గురుదాస్పూర్), శ్రీపాద్ వై నాయక్ (పానాజీ), అనురాగ్ ఠాకూర్ (హమీర్ పూర్), టిపిఎస్ రావత్ (పౌరి)ల అభ్యర్థిత్వాలు ఖరారయ్యాయి. లోకసభ ఎన్నికలకు బిజెపి దీంతో కసరత్తు ప్రారంభించినట్లేనని భావించాలి. గుజరాత్, కర్ణాటక శాసనసభ ఎన్నికలను దృష్టిలో పెట్టుకుని లోకసభకు ముందుగానే అభ్యర్థుల జాబితాను వెల్లడిస్తున్నట్లు బిజెపి సీనియర్ నాయకుడు ఎం. వెంకయ్యనాయుడు చెప్పారు. ఆగస్టుకల్లా అభ్యర్థుల జాబితాను పూర్తిగా వెల్లడించనున్నట్లు ఆయన తెలిపారు.