కెసిఆర్ కు అజిత్ ఆహ్వానం

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావుకు రాష్ట్రీయ లోకదళ్ (ఆర్ఎల్డీ) నేత అజిత్ సింగ్ నుంచి గురువారం ఆహ్వానం వచ్చింది. కెసిఆర్ ను ఆయన విందుకు ఆహ్వానించారు. దీంతో కెసిఆర్ రేపు (శుక్రవారం) సాయంత్రం ఢిల్లీ వెళ్తున్నారు. నిజానికి కెసిఆర్ ఈ నెల 20వ తేదీన ఢిల్లీ వెళ్లాలని అనుకున్నారు. అజిత్ సింగ్ ఆహ్వానంతో ముందుగానే ఆయన ఢిల్లీ వెళ్తున్నారు.

ఇప్పటికే కెసిఆర్ కు బహుజన సమాజ్ పార్టీ (బిఎస్పీ) నేత మాయావతి, ఎన్డీయె కన్వీనర్ జార్జి ఫెర్నాండెజ్ ల నుంచి ఫోనులు వచ్చాయి. యుపిఎ ప్రభుత్వానికి వ్యతిరేకంగా ఓటు వేయాలనే కెసిఆర్ నిర్ణయాన్ని ఈ ఇద్దరు నేతలు కూడా స్వాగతించారు. అయితే ఈ నెల 22న జరిగే యుపిఎ ప్రభుత్వ బలపరీక్షలో ఎటు వైపు ఉండాలనే విషయంపై అజిత్ సింగ్ ఇంకా నిర్ణయం తీసుకోలేదు.