చిరు పర్యటనలపై అద్వానీ ఆరా

న్యూఢిల్లీ: 'మెగా' పర్యటనపై బీజేపీ అగ్రనేత అద్వానీ ఆసక్తి చూపారు. ప్రజా స్పందనను ప్రత్యేకంగా అడిగి తెలుసుకున్నారు. కోర్‌ కమిటీతో రాష్ట్ర బీజేపీ నాయకుల సమావేశం సందర్భంగా చోటుచేసుకున్న పరిణామమిది. రాష్ట్ర బీజేపీ అగ్రనేతలంతా ఢిల్లీ చేరుకున్నారు. రాబోయే ఎన్నికల్లో పార్టీ తరఫున తీసుకోవాల్సిన నిర్ణయాలు, ఎత్తులు, వ్యూహాలు తదితర అంశాలపై శుక్రవారం అద్వానీ, రాజ్‌నాథ్‌సింగ్‌లతో కూడిన కోర్‌ కమిటీతో సమావేశమయ్యారు.

సుదీర్ఘంగా చర్చ జరిగింది. ఈ సందర్భంగా ప్రజారాజ్యం అధినేత చిరంజీవి తొలి రాజకీయ పర్యటనపై అద్వానీ ఆసక్తి కనబరిచారు. చిరు పర్యటనకు ప్రజల నుంచి వచ్చిన స్పందనపై ప్రత్యేక శ్రద్ధ చూపారు. చిరంజీవి పర్యటనకు ప్రజల నుంచి అనూహ్య స్పందన వచ్చిందని రాష్ట్ర బీజేపీ అధ్యక్షుడు బండారు దత్తాత్రేయ అద్వానీకి వివరించినట్లు తెలిసింది.