ప్రాజెక్టుల్లో ముమ్మాటికీ అవినీతి: చిరు

హైదరాబాద్: ప్రభుత్వానికి చిత్తశుద్ధి ఉంటే కాకతీయల గడ్డ మీద కరువెందుకు ఉంటుందని ప్రజారాజ్యం అధినేత చిరంజీవి ప్రశ్నించారు. ఆయన ప్రజా అంకిత యాత్ర మంగళవారం వరంగల్ జిల్లాలో సాగుతోంది. ఆయన ములుగు సభలో ప్రభుత్వంపై తీవ్ర విమర్శలు గుప్పించారు. ప్రాజెక్టుల పేరుతో జరుగుతోంది ముమ్మాటికీ అవినీతేనని, కాదని ప్రభుత్వం నిరూపించగలదా అని ఆయన అన్నారు. గిరిజనులకు కనీస వసతులు కూడా ప్రభుత్వాలు కల్పించలేకపోయాయని ఆయన విమర్శించారు. ప్రకృతితో సహజీవనం చేసే గిరిజనుల పట్ల పాలకులు నిర్లక్ష్య వైఖరి ప్రదర్శిస్తున్నారని ఆయన అన్నారు.

గిరిజనులకు భూపంపిణీ చేయడంలో కూడా ప్రభుత్వం చిత్తశుద్ధి ప్రదర్శించడం లేదని ఆయన అన్నారు. గిరిజనులకు ప్రభుత్వ పథకాలు అందుతున్నాయో లేదో పరశీలించడానికి ఇక్కడికి రావాలని ఆయన ప్రభుత్వ పెద్దలను సవాల్ చేశారు. తాను ఈ ఉదయమే సమ్మక్క, సారలక్కలను దర్శనం చేసుకున్నానని, ఇది గొప్ప అనుభూతి అని ఆయన అన్నారు. తనకు సమ్మక్క సారలక్కలను చూసే భాగ్యం లభిస్తుందో, లేదోనని అనిపిస్తూ ఉండేదని, ఇప్పుడు ప్రజల ద్వారా తనకు ఆ అవకాశం లభించిందని ఆయన అన్నారు.