చేనేత సొసైటీల అప్పుల మాఫీ: వైయస్

నల్లగొండ: నేత కార్మికులను అన్ని విధాలుగా ఆదుకుంటున్నామని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. నల్లగొండ జిల్లా భూదాన్ పోచంపల్లిలో ఆయన ఆదివారం చేనేత టెక్స్ టైల్ పార్కును ప్రారంభించారు. చేనేత సొసైటీల బాకీలు 330 కోట్ల రూపాయల రుణాలను మాఫీ చేస్తామని ఆయన హామీ ఇచ్చారు. వారం లోగానే ఇందుకు సంబంధించిన ఉత్తర్వులు కూడా జారీ చేస్తామని ఆయన చెప్పారు. తాము ఆడిన మాట తప్పబోమని ఆయన చెప్పారు. చేనేత సొసైటీల వద్ద సరుకులను ఆప్కో పూర్తిగా కొంటుందని ఆయన చెప్పారు.

చేనేత టెక్స్ టైల్ పార్కు దేశంలోనే అత్యుత్తమైందని, దేశంలో ఎక్కడా ఇటువంటి పార్కు లేదని ఆయన అన్నారు. చేనేత కార్మికులకు ఐదు వేల మంది ఈ పార్కు వల్ల ఉపాధి కలుగుతుందని ఆయన చెప్పారు. ఒక్కొక్కరికి నెలకు నాలుగు వేల రూపాయలేసి ఆదాయం సమకూరుతుందని ఆయన చెప్పారు. పనులు లేవని చేనేత కార్మికులు బాధపడాల్సిన అవసరం లేకుండా పోతుందని ఆయన అన్నారు.