కాంగ్రెస్ ప్రచారానికి మహేష్ : కృష్ణ

విశాఖపట్నం: ప్రిన్స్‌ మహేష్ బాబు కాంగ్రెస్‌ పార్టీ ప్రచారానికి వస్తారని సూపర్‌స్టార్‌ కృష్ణ అన్నారు. శనివారం విశాఖ నుంచి ఆయన హైదరాబాదు బయలుదేరి వెళ్లారు. ఈ సందర్భంగా ఆయన మీడియా ప్రతినిధులతో మాట్లాడారు. రాబోయే ఎన్నికల్లో మళ్లీ కాంగ్రెస్‌ పార్టీయే విజయం సాధిస్తుందన్నారు. కొత్త పార్టీలు ఎన్ని వచ్చినా కాంగ్రెస్‌కు ఢోకా లేదన్నారు.

కృష్ణ, మహేష్ యువసేన కార్యకర్తలు ఇప్పటికే కాంగ్రెస్ కోసం ప్రచారం మొదలు పెట్టిన విషయం తెలిసిందే. చిరంజీవి ప్రజారాజ్య పార్టీలోనే సినీ గ్లామర్ ను, తెలుగుదేశం పార్టీలోని నందమూరి గ్లామర్ ను ఎదుర్కోవడానికి కాంగ్రెస్ సినీ కళాకారులను దగ్గరికి తీస్తున్న విషయం కూడా తెలిసిందే. ఇందులో భాగంగా మహేష్ ను ప్రచారానికి వాడుకోవాలని కాంగ్రెస్ నాయకత్వం తీవ్రంగా ప్రయత్నిస్తోంది.