వైయస్ కోటలో చిరంజీవి మాట

కడప: ముఖ్యమంత్రి డాక్టర్ వైయస్ రాజశేఖర రెడ్డి సొంత నియోజకవర్గం పులివెందులలో బుధవారం ప్రజారాజ్యం అధినేత చిరంజీవి తన శంఖారావం పూరించారు. పులివెందులలో ఆయనకు ప్రజల నుంచి విశేష స్పందన లభించింది. చిరంజీవి ప్రజా అంకిత యాత్ర బుధవారం కడప జిల్లాలో ప్రవేశించింది. తొండూరు వద్ద కాంగ్రెస్ కార్యకర్తలు చిరంజీవికి నల్లజెండాలతో నిరసన తెలియజేశారు. చిరంజీవి యాత్రను నల్లజెండాలతో అడ్డుకోవడానికి ప్రయత్నించిన కాంగ్రెస్ కార్యకర్తలపై ఒక చోట పోలీసులు లాఠీచార్జీ చేశారు.

తాను రాజకీయాల్లో కొత్త పాత్ర పోషిస్తున్నానని, ఈ పాత్రలో తాను జీవిస్తానని చిరంజీవి పులివెందులలో అన్నారు. పులివెందుల ప్రజలు తనకు అపూర్వ స్వాగతం పలికారని, ఈ అనుభూతి తనలో ఉండిపోతుందని ఆయన అన్నారు. ప్రజలకు తాను అండగా ఉంటానని, ప్రజలకు సేవ చేస్తానని ఆయన చెప్పారు. ఇంత మంది ప్రజలు తన వెనక ఉన్నారంటే ఎంతో గుండె ధైర్యం కలుగుతోందని, తనకు అది చాలునని ఆయన అన్నారు. యువతకు ఉపాధి అవకాశాలు కల్పించడంలో ప్రభుత్వాలు విఫలమయ్యాయని ఆయన విమర్శించారు. తమ పార్టీ అధికారంలోకి వస్తే ఆ సమస్యను పరిష్కరిస్తామని ఆయన హామీ ఇచ్చారు. మహిళల సమస్యలపై కూడా ఆయన తన ప్రసంగంలో ప్రధానంగా ప్రస్తావించారు.