జోగయ్యపై చిరంజీవి ఆగ్రహం?

అనంతపురం: హరిరామ జోగయ్య లేఖపై చిరంజీవి ఆగ్రహం వ్యక్తం చేసినట్టు తెలుస్తోంది. ప్రజారాజ్యం పార్టీ అంతర్గత లోపాలను జోగయ్య ఆ లేఖలో పేర్కొన్నారు. ఇది పార్టీ అధినేత చిరంజీవికి 'మెగా' ఆగ్రహాన్ని తెప్పించింది. నేర్పుగా వ్యవహరిస్తారని భావించిన వారే లేనిపోని చికాకులు కలిగించడం పట్ల చిరంజీవి సీరియస్‌గా ఉన్నట్టు తెలిసింది. 'పెద్దవారని బాధ్యతలు అప్పగిస్తే ఇలాగేనా చేసేది' అని తీవ్ర ఆగ్రహాన్ని వ్యక్తం చేసినట్టు సమాచారం. వాస్తవానికి జోగయ్య లేఖ ఇంకా చిరంజీవికి అందలేదని పార్టీ వర్గాలు చెబుతున్నాయి.

అయితే నేరుగా చిరంజీవి బెడ్‌రూంలో ఉండే ఫ్యాక్స్‌ నెంబర్‌కే పంపినట్టు జోగయ్య ప్రకటించడం గమనార్హం. లేఖ బయటకు ఎలా లీక్‌ అయిందన్న దానిపై పార్టీలో తర్జనభర్జనలు సాగుతున్నాయి. ప్రభుత్వం తమ ఫ్యాక్స్‌లను సైతం ట్యాప్‌ చేస్తోందంటూ పీఆర్పీ ఆరోపించింది. దాని పర్యవసానమే జోగయ్య లేఖ లీక్‌ అని పేర్కొంది. తమ ఫోన్లను ట్యాప్‌ చేస్తున్నారంటూ ఇటీవల పీఆర్‌పీ నేతలు ఆరోపించిన విషయం విదితమే.

నేరుగా జోగయ్య వర్గీయులే ఈ లేఖను ఒక పత్రికకు లీక్‌ చేసి ఉంటారని మరో కథనం వినిపిస్తుండగా, జోగయ్య కుమారుడే లీక్‌ చేసి ఉంటారనేది ఇంకో కథనం. జోగయ్య కుమారుడు కాంగ్రెస్‌ పార్టీలో ఉన్నందున ఆయన ద్వారానే ఈ లేఖ లీక్‌ అయి ఉంటుందన్న అనుమానాలు పీఆర్‌పీలో వ్యక్తమవుతున్నాయి. తెలంగాణ పట్ల ప్రజారాజ్యం తీసుకున్న నిర్ణయం వల్ల కోస్తా ఆంధ్రలో కొంత నష్టం జరుగుతుందంటూ మరో సీనియర్‌ నేత తమ్మినేని సీతారాం చేసిన వ్యాఖ్యల పట్ల కూడా 'చిరు' శిబిరం చిటపటలాడుతోంది.