చిరుకు ఆ ధైర్యముందా?: వైయస్

హైదరాబాద్: ప్రజారాజ్యం పార్టీ అధినేత చిరంజీవికి ప్రాజెక్టులు కట్టే ధైర్యం ఉందా అని ముఖ్యమంత్రి డాక్టర్ వైయస్ రాజశేఖర రెడ్డి ప్రశ్నించారు. ప్రాణహిత - చేవెళ్ల ప్రాజెక్టుకు ఆయన బుధవారం సాయంత్రం రంగారెడ్డి జిల్లా చేవెళ్లలో శంకుస్థాపన చేశారు. తెలుగుదేశం, తెరాసలకు తోడు ఇపుడు మరోపార్టీ వచ్చిందని, చిరంజీవి అనే నటుడు కొత్తగా పార్టీ పెట్టి అసలు ప్రాజెక్టులే అవసరం లేదని చెబుతున్నారని, నాగార్జునసాగర్‌, శ్రీశైలం, శ్రీరాంసాగర్‌ వంటి ప్రాజెక్టులను సరిగా చూసుకుంటే చాలట అని, చిరంజీవికి అసలు అవగాహన ఉందా అని, ఇలాంటివారు పొరపాటునైనా ప్రాజెక్టుల గురించి ఆలోచిస్తారా అని ఒకవేళ ఆలోచించినా వాటిని కట్టే ధైర్యం ఉంటుందా అని వైఎస్‌ అన్నారు.

ప్రాజెక్టులపై ఆలోచించడంలో మాకున్నంత ధైర్యం, వాటిని పూర్తిచేయించే సాహసం ఏ ప్రతిపక్షానికైనా ఉందా అని, తెలుగుదేశం, తెరాస, ప్రజారాజ్యం పార్టీలను ప్రజలు ప్రశ్నించాలని ఆయన అన్నారు. ఇవన్నీ చేయాలంటే ఒక్క కాంగ్రెస్‌ పార్టీకే సాధ్యమని స్పష్టంచేశారు. ఇతర పార్టీల వాళ్లు తమను తామే ప్రశ్నించుకోవాలన్నారు. ప్రాణహిత-చేవెళ్ల పథకానికి పునాదిరాయి పడిన ఈరోజు తెలంగాణలో చరిత్రాత్మకమైనదిగా అభివర్ణించారు.