ఇందిరమ్మ వేస్టా?:చిరుపై బొత్స

హైదరాబాద్: పీఆర్పీ అధినేత చిరంజీవి ఇందిరమ్మ కార్యక్రమంపై చేసిన వ్యాఖ్యలపై రాష్ట్ర గృహ నిర్మాణ శాఖ మంత్రి బొత్స సత్యనారాయణ తీవ్రంగా స్పందించారు. ఇందిరమ్మ పథకం వేస్ట్‌ అనడం అందరికీ ఫ్యాషనైపోయిందని ఆయన ఎద్దేవా చేశారు. పోచారం, బండ్లగూడల్లో రాజీవ్‌ స్వగృహ కార్పొరేషన్‌ నిర్మించిన మోడల్‌ హౌస్‌లను మంత్రి ఆనం రామనారాయణరెడ్డితో కలిసి గురువారం బొత్స సందర్శించారు.

"రాజీవ్‌ స్వగృహ ధరలు తగ్గించేది లేదు, పెంచేదీ లేదు'' అని బొత్స అన్నారు.ప్రైవేటు వ్యక్తులు ఫ్లాట్ల ధరలు ఎంత తగ్గించినా స్వగృహ ధరల కంటే ఎక్కువగానే ఉన్నాయని తెలిపారు. రాజీవ్‌ స్వగృహ కింద మొదటి విడతగా 46 వేల అపార్ట్‌మెంట్ల నిర్మాణం ప్రారంభించామన్నారు. సంవత్సరంలోగా ఇవి పూర్తవుతాయని, కొత్తవాళ్లు దరఖాస్తు చేసుకుంటే వీటిలో ప్రాధాన్యత కల్పిస్తామని చెప్పారు. పర్యటన ఏర్పాట్లు రాజీవ్‌ స్వగృహ కార్పొరేషన్‌ ఎండీ శాలినీ మిశ్రా పర్యవేక్షించారు.