సిగ్గుపడాల్సిందే:చిరు

హైదరాబాద్‌: చందమామపైకి రాకెట్లను పంపుతున్నా గిరిజన తండాల్లోకి ఎర్రబస్సులను పంపలేకపోతున్నాం. ఇది సిగ్గుపడాల్సిన విషయం'' అని చిరంజీవి తీవ్రంగా దుయ్యబట్టారు. హైదరాబాద్‌ శివారులోని ఖాజాగూడ గ్రౌండ్‌లో ఆదివారం సాయంత్రం 'పీఆర్పీ రాష్ట్ర గిరిజన సమ్మేళనం' జరిగింది. ఈ సభలో గిరిజనులనుద్దేశించి చిరంజీవి ప్రసంగించారు. ఈ సందర్బంగా ఓటు' మాటలు చెప్పం... రాజకీయాలకు ఉపయోగించుకోం... అన్నీ చేతల్లో చేసి చూపిస్తాం' అని గిరిపుత్రులకు ప్రజారాజ్యం పార్టీ అధినేత చిరంజీవి హామీ ఇచ్చారు. అభివృద్ధిలో ఎంతో ముందున్నాం.. అభివృద్ధి చేస్తున్నాం అని చెప్పుకునే పార్టీలు నేడు అడవి బిడ్డల పరిస్థితిని చూసి సిగ్గుతో తలవంచుకోవాలని ఆయన మండిపడ్డారు.

ఇప్పటికీ వారికి విషజ్వరాలు ప్రబలితే మంచాలపైనే వారిని మోసుకెళ్లాల్సిన దుస్థితి. రవాణా సౌకర్యాలు మృగ్యం... రాజ్యాంగం ప్రకారం గిరిజనానికి బడ్జెట్‌లో ఆరు శాతం నిధులను కేటాయించాలని, కానీ ఎప్పుడూ రెండు, మూడు శాతానికి మించడం లేదని తెలిపారు. కనీసం వాటినైనా నూరు శాతం ఖర్చుచేసి సక్రమంగా గిరిజనుల దరి చేర్చి ఉంటే బ్రహ్మాండమైన అభివృద్ధి జరిగి ఉండేదని... అవినీతి రాజ్యంలో చిత్తశుద్ధిలేని పాలకుల కారణంగా అభివృద్ధి ఎక్కడ వేసిన గొంగళి అక్కడే చందంగా మారిందని ఆయన విమర్శించారు. కనీసం అటవీ ఉత్పత్తులపైనా ఆదివాసులకు హక్కు లేకుండా పోతోందని అన్నారు.

అలాగే ప్రజారాజ్యం అధికారంలోకి వస్తే గిరిజనులను సొంత బిడ్డల్లా సాకుతుంది. పెద్దపీట వేస్తుంది. సామాజిక న్యాయం అందిస్తుంది. వారికి సంబంధించిన అన్నిరకాల ప్రయోజనాలనూ కాపాడుతుంది'' అని పీఆర్పీ అధినేత చిరంజీవి అన్నారు. ఏళ్లతరబడి వివాదాస్పదంగా మారిన 'వన్‌ ఆఫ్‌ సెవెంటీ' (1/70) చట్టంపై లోతైన పరిశీలనతో అధ్యయనం చేస్తామన్నారు.