తెలంగాణపై వైయస్ మళ్ళీ అదే

న్యూఢిల్లీ: రాష్ట్ర కాంగ్రెస్‌ అధ్యక్షుడు డీఎస్‌,ముఖ్యమంత్రి వై.ఎస్‌.రాజశేఖరరెడ్డిలు ఈరోజు మధ్యాహ్నం ప్రణబ్‌ ముఖర్జీతో భేటీ అయ్యారు.ఆ సమావేశంలో తెలంగాణా విభజనపై రాష్ట్రంలో పెరుగుతున్న ఒత్తిడి, భవిష్యత్‌ వ్యూహాలు తదితర విషయాలపై వారు చర్చించారని సమాచారం. అనంతరం సీఎం మీడియాతో మాట్లాడుతూ తెలంగాణాపై పార్టీ అధిష్టానం త్వరలోనే విధాన నిర్ణయాన్ని ప్రకటిస్తుందని చెప్పారు.

నిన్న కూడా ఢిల్లీలో కాంగ్రెస్‌ సీనియర్‌ నేతలు ప్రణబ్‌ ముఖర్జీ, అహ్మద్‌ పటేల్‌లతో దాదాపు రెండు గంటలపాటు సమాలోచనలు జరిపిన అనంతరం వైఎస్‌ మీడియాతో మాట్లాడారు. అప్పుడూ ఇలాగే చెప్పుకొచ్చారు. తెలంగాణాపై అన్ని అంశాలను పరిశీలించి అధిష్ఠానం సరైన సమయంలో నిర్ణయం తీసుకుంటుందని తెలిపారు.

తెలంగాణపై ఎన్నికల్లోపు అధిష్ఠానం ఏదైనా నిర్ణయం తీసుకుంటుందని అనుకుంటున్నారా? అని ప్రశ్నించగా... 'చూద్దాం. చూద్దాం. తెలంగాణ అంశాన్ని ప్రధానమైన అంశంగా పార్టీ భావిస్తోంది. దీనిపై సరైన సమయంలో సరైన నిర్ణయాన్ని వెల్లడిస్తుంది'' అని బదులిచ్చారు. అదే సయంలో తెలంగాణపై పార్టీ ఎలాంటి వైఖరి తీసుకున్నా, తన ప్రభుత్వం ప్రవేశపెట్టిన అభివృద్ధి కార్యక్రమాలు, సంక్షేమ పథకాలతో గెలుపు సాధ్యమని వైఎస్‌ చెప్పుకొచ్చారు. మళ్ళి ఇవాళా అదే మాట చెప్పటం చర్ఛనీయాంసంగా మారింది.