ప్రజాస్వామ్యం పాతర: రేణుకా చౌదరి

న్యూఢిల్లీ: ఒక హిందూ యువతి ముస్లీం యువకునితో కలిసి తిరగడాన్ని ఆక్షేపించడం తగదని, ఇది మత విద్వేషాలను రెచ్చగొట్టే చర్య అని శనివారం కేంద్ర మంత్రి రేణుకాచౌదరి అన్నారు. మంగళూరు పబ్‌ దాడిపై స్పందిస్తూ ఇది ఖచ్చితంగా ప్రజాస్వామ్య హరణమేనన్నారు. రాష్ట్రంలో శాంతి భద్రతల పరిస్థితికి ఈ ఘటన ఒక ఉదాహరణగా నిలుస్తుందని నిప్పులు చెరిగారు.

కర్నాటకలో ప్రజాస్వామ్యాన్ని పాతిపెట్టి, బిజెపి సర్కారు నియంతృత్వ పోకడలను అవలంభిస్తోందని ఆమె అభిప్రాయపడ్డారు.అదేవిధంగా కేరళలో సిపిఎం ఎమ్మెల్యే కుమార్తె కిడ్నాప్‌ ఉదంతాన్ని కూడా ఎత్తిచూపుతూ, బిజెపి వైఖరిపై తీవ్ర వ్యాఖ్యలు చేశారు. ఇది జాతీయ భద్రతా సమస్యగా పరిణమించే అవకాశమున్నదని ఆమె అన్నారు.