ఉన్నట్టుండి చనిపోయిన నల్ల పులి! ప్రపంచంలోనే అరుదైన జాతి...
అటవీ ప్రపంచంలోనే అత్యంత అరుదైన ప్రతిభ కలిగిన, కంటికి కనిపించడమే గగనమైన ఒక నల్ల చారల (స్యూడో మెలనిస్టిక్) ఆడ పులి అనుమానాస్పద స్థితిలో ప్రాణాలు కోల్పోయింది. ఒడిశాలోని ఒడిశాలోని ప్రసిద్ధ సిమిలిపాల్ టైగర్ రిజర్వ్ కోర్ అటవీ ప్రాంతంలో ఐదేళ్ల వయసున్న ఈ అరుదైన ఆడ పులి కళేబరాన్ని గస్తీ తిరుగుతున్న అటవీ సిబ్బంది కనుగొన్నారు. ప్రపంచంలోనే అత్యంత అరుదైన నల్ల పులులకు నిలయమైన సిమిలిపాల్లో ఈ ఘటన జరగడంతో వన్యప్రాణి సంరక్షణ అధికారులు తీవ్ర దిగ్భ్రాంతికి గురయ్యారు. ఈ ఘటనపై ఉన్నతాధికారులు తక్షణమే విచారణకు ఆదేశించారు.
గాయాలు లేవు.. ఆనవాళ్లు లేవు!
సిమిలిపాల్ సౌత్ డివిజన్ పరిధిలోని జటియాని క్యాంప్ సమీపంలో ఈ ఘోరం వెలుగులోకి వచ్చింది. అటవీ శాఖ ప్రిన్సిపాల్ చీఫ్ కన్జర్వేటర్ (పిసిసిఎఫ్-వైల్డ్లైఫ్) ప్రేమ్ కుమార్ ఝా తెలిపిన వివరాల ప్రకారం, దట్టమైన కోర్ అటవీ ప్రాంతంలో దొరికిన పులి శరీరంలో ఎలాంటి గాయాలు కానీ, వ్యాధి సోకినట్లు చూపే బాహ్య సంకేతాలు కానీ కనిపించలేదు. ఘటనా స్థలంలో సేకరించిన ప్రాథమిక ఆధారాలను బట్టి పులి మృతి చెంది ఎక్కువ సమయం కాలేదని, మృతదేహం చాలా తాజాగానే ఉందని అధికారులు స్పష్టం చేశారు.
అనుమానాల నివృత్తికి ల్యాబ్ పరీక్షలు
నేషనల్ టైగర్ కన్జర్వేషన్ అథారిటీ (NTCA) నిబంధనల ప్రకారం శుక్రవారం రోజున నిపుణులైన పశువైద్యుల బృందం, ఎన్టీసీఏ ప్రతినిధుల సమక్షంలో శవపరీక్ష నిర్వహించారు. విషపూరితమైన పదార్థాలేమైనా శరీరంలోకి వెళ్లాయా? లేక అంతర్గత అనారోగ్య సమస్యలేమైనా ఉన్నాయా? అనే విషయాలను ఖచ్చితంగా తేల్చేందుకు శరీర భాగాల శాంపిల్స్ను సేకరించారు. వీటిని సమగ్ర విశ్లేషణ కోసం ఒడిశా అగ్రికల్చర్ విశ్వవిద్యాలయంలోని సెంటర్ ఫర్ వైల్డ్లైఫ్ హెల్త్ పరిశోధనశాలకు పంపినట్లు అధికారులు తెలిపారు. ల్యాబ్ నివేదిక వచ్చాకే అసలు మరణానికి గల కారణాలు తెలుస్తాయని పేర్కొన్నారు.
అగ్నికి ఆహుతి.. నిఘా నీడన క్రతువు
పోస్ట్మార్టమ్ ప్రక్రియ పూర్తయిన వెంటనే, నిబంధనలకు అనుగుణంగా అటవీ అధికారుల నిఘా నడుమ పులి కళేబరాన్ని దహనం చేశారు. శవపరీక్ష మొదలుకుని దహన సంస్కారాలు పూర్తయ్యే వరకు ప్రతీ ఘట్టాన్ని కెమెరాల్లో చిత్రీకరించారు. ఇటీవల నిర్వహించిన కెమెరా ట్రాపింగ్ గణాంకాల ప్రకారం సిమిలిపాల్ అభయారణ్యంలో మొత్తం 35 పెద్ద పులులు ఉండగా, అందులో 19 అరుదైన నల్ల చారల పులులే ఉన్నాయి. ఉన్నట్టుండి వీటిలో ఒక ఐదేళ్ల ఆరోగ్యవంతమైన ఆడ పులి మరణించడం అటవీ శాఖకు పెద్ద పూడ్చలేని లోటుగా మారింది.
Click it and Unblock the Notifications
Sign in with Google