దాసరి బాధ పడక తప్పదు: అల్లు

హైదరాబాద్: దాసరి నారాయణరావు తీసిన "మేస్త్రి" చిత్రాన్ని తాను చూడలేదని, అయితే అందులో ఉన్న ముఖ్యాంశాలను విన్నానని ప్రజారాజ్యం నాయకుడు, ప్రముఖ నిర్మాత అల్లు అరవింద్ శుక్రవారం ఇక్కడ విలేకరుల సమావేశంలో చెప్పారు. కొత్త పార్టీలు ఏమీ చేయలేవన్న అభిప్రాయాన్ని ఆ సినిమా ద్వారా దాసరి ప్రజలకు చెప్పదలుచుకున్నారని, కానీ ప్రజారాజ్యం రాష్ట్రంలో విజయం సాధించిన తర్వాత దాసరి నాలుక కరుచుకుని పశ్చాత్తాపం చెందాల్సి వస్తుందని ఆయన అన్నారు.

ప్రజారాజ్యంలో పార్టీలో కోవర్టులు చేరుతున్న మాట వాస్తవమేనని అరవింద్ అన్నారు. కాకినాడకు చెందిన సత్య అనే వ్యక్తిని తాము ఆ జిల్లాకు కో కన్వీనర్ ని చేశామని, కానీ ఆయన తన సొంత పార్టీ అయిన తెలుగుదేశంలోకి చేరిపోయారని, వెళ్ళే ముందు తాము టికెట్ల కోసం కోట్లు వసూలు చేస్తున్నామని విమర్శించి వెళ్ళిపోయారని, వారి అధినేత అదేశం మేరకే కోవర్టులు ఇలా ప్రజారాజ్యంలోకి వచ్చి అలా వెళ్ళిపోతున్నారని ఆయన విమర్శించారు.