మహేష్ బాబు ఎవరు‌?: రోశయ్య

హైదరాబాద్: 'మహేష్.. ఆయనెవరు?' అని రాష్ట్ర ఆర్థిక మంత్రి రోశయ్య ఆశ్చర్యం వ్యక్తం చేశారు. "తెలుగుదేశం పార్టీ తరఫున జూనియర్‌ ఎన్టీఆర్‌ ప్రచారంలోకి దింపారు కదా..కాంగ్రెస్‌ పార్టీ మహేష్ను రంగంలోకి దింపుతుందా?'' అని రోశయ్యను కొందరు మీడియా ప్రతినిధులు ప్రశ్నించగా రోశయ్య పైవిధంగా స్పందించారు. మొదట ఆ ప్రశ్న విన్న వెంటనే..'మహేష్..ఆయనెవరు?' అన్నారు. కాంగ్రెస్‌ శాసనసభాపక్ష కార్యాలయంలో మీడియా సమావేశం అనంతరం..కొందరు మీడియా ప్రతినిధులతో రోశయ్య ఇష్టాగోష్టిగా మాట్లాడారు.

ఆ తర్వాత మీడియా వారు ప్రిన్స్‌ మహేష్ బాబు..సినీహీరో కృష్ణ కుమారుడని చెప్పారు..'అవునా..నేనెవరి గురించో అనుకున్నా..మా పార్టీలో మహేష్ ఎవరైనా ఉన్నారేమో..ముఖానికి రంగేసుకున్నారేమోనని సందేహపడ్డాను' అని వివరణ ఇచ్చారు. తనకు నిజంగా మహేష్బాబు తెలియదని రోశయ్య అన్నారు.

ఇక తాము అందుబాటులో ఉన్న సినీనటుల ఇష్టాయిష్టాలను బట్టి ప్రచారం చేయిస్తామని చెప్పారు. దానికి మీడియా వారు...కాంగ్రెస్‌ నేతలే పెద్ద నటులని..ఇంకా సినీనటులెందుకన్న మంత్రి బొత్స సత్యనారాయణ చేసిన వ్యాఖ్యలు గుర్తు చేసారు. దానికాయన..'బొత్సా యువకుడు కదా.. ఏదైనా తేలిగ్గా మాట్లాడేస్తాడు' అంటూ ముక్తాయించారు.

ఇంతకీ మహేష్బాబు కాంగ్రేస్ ప్రచారానికి వస్తారో రారో తెల్చలేదు. కానీ రోశయ్య మాటలను బట్టి మహేష్ ఒప్పుకోలేదనే విషయం స్పష్టమవుతోందని అంతా అనుకోవటం జరిగింది. అలాగే నంది అవార్డును తీసుకున్నప్పుడు..కాంగ్రెస్‌కు మద్దతుగా ఏమైనా మాట్లాడతాడేమోనని ఆశగా ఎదురుచూసిన వర్గాలు..ఏమీ మాట్లాడకపోవడంతో నిరాశకు లోనయిన సంగతి తెలిసిందే.