అసెంబ్లీ బరిలో బ్రహ్మానందం, పోసాని

గుంటూరు: గుంటూరు జిల్లానుంచి ఇద్దరు సినీ ప్రముఖులను పోటీ దించాలని ప్రజారాజ్యం పార్టీ ఆలోచిస్తోంది. ప్రముఖ దర్శకుడు పోసాని కృష్ణ మురళిని పొన్నూరు నియోజకవర్గం నుంచి, ప్రముఖ హాస్యనటుడు బ్రహ్మానందాన్ని సత్తెనపల్లి నియోజకవర్గం నుంచి పోటీ దింపాలని ప్రజారాజ్యం పార్టీ అధినేత చిరంజీవి యోచిస్తున్నట్లు తెలుస్తోంది. బ్రహ్మానందం స్వస్థలం సత్తెనపల్లి నియోజకవర్గంలోని చాగంటివారి పాలెం. తెలుగు అధ్యాపకుడిగా పనిచేసిన బ్రహ్మానందం రెండు దశాబ్దాల క్రితం తెలుగు సినీ రంగంలో ప్రవేశించారు. ఆయనకు మంచి ఆదరణ, విశేష గౌరవం ప్రజల్లో ఉన్నాయి.

కాగా, పోసాని కృష్ణమురళి స్వస్థలం పెదకాకాని. నాగార్జున విశ్వవిద్యాలయంలో చదువుతున్న సమయంలో ఆయన విద్యార్థి సంఘాల్లో క్రియాశీలక పాత్ర పోషించారు. మొదటి నుంచీ ఆయన కాంగ్రెసు వ్యతిరేకిగానే వ్యవహరిస్తూ వస్తున్నారు. చిరంజీవి రాజకీయాల్లోకి వచ్చి ప్రజారాజ్యం పార్టీని స్థాపించడంతో ఆ పార్టీలో చేరారు. ఆయన సినీ రంగంలో ఉంటూనే స్వస్థలంలోని బంధువులు, మిత్రులతో సంబంధ బాంధవ్యాలు కొనసాగిస్తూ వస్తున్నారు. తెలుగుదేశం పార్టీ తరఫున ధూళిపాళ్ల నరేంద్ర కుమార్ బరిలోకి దిగుతుండడంతో అదే వర్గానికి చెందిన పోసాని కృష్ణమురళిని పోటీకి దించాలని ప్రజారాజ్యం పార్టీ ఆలోచిస్తున్నట్లు సమాచారం.