కాంగ్రెసుకు పవార్ షాక్

న్యూఢిల్లీ: ఐక్య ప్రగతిశీల కూటమి (యుపిఎ)కి ఎన్సీపి నేత శరద్ పవార్ షాక్ ఇస్తున్నారు. కాంగ్రెస్ నేతృత్వంలోని ఎన్సీపి నేత శరద్ పవార్ శుక్రవారం జరిగే తృతీయ కూటమి సభకు హాజరు కావాలని నిర్ణయించుకున్నారు. ఒరిస్సాలోని భువనేశ్వర్ లో జరిగే మూడో కూటమి బహిరంగ సభలో సిపిఎం నేత ప్రకాష్ కారత్, బిజెడి నేత నవీన్ పట్నాయక్ లతో వేదికను పంచుకుంటారు. ప్రధాని పదవిపై శరద్ పవార్ కన్ను వేసినట్లు వార్తలు కూడా వస్తున్నాయి.

కాంగ్రెసుతో పొత్తు మహారాష్ట్రకే పరిమితమని ఎన్సీపి స్పష్టం చేస్తోంది. మన్మోహన్ సింగ్ కాంగ్రెస్ పార్టీ ప్రధాని అభ్యర్థి మాత్రమేనని, యుపిఎ ప్రధాని అభ్యర్థి కారని కూడా స్పష్టం చేసింది. బిజెడితో ఒరిస్సాలో సీట్ల సర్దుబాటు చేసుకున్నందున మూడో కూటమి సభకు హాజరవుతున్నట్లు శరద్ పవార్ చెప్పారు. శరద్ పవార్ నిర్ణయాన్ని స్వాగతిస్తున్నట్లు సిపిఎం నేత సీతారాం ఏచూరి చెప్పారు.