చిరు పార్టీకి డాక్టర్ సమరం గుడ్ బై

విజయవాడ: ప్రజారాజ్యం పార్టీకి ప్రముఖ సెక్స్ డాక్టర్ సమరం సోమవారం ఉదయం రాజీనామా చేశారు. ప్రజారాజ్యం స్ధాపనకు ముందు నుంచి చిరంజీవికి సలహాదారుగా ఉన్న డాక్టర్ సమరం పార్టీలో అంతర్గత వ్యవహారాలపై అసంతృప్తి ఉంది. ఏ లక్ష్యాల కోసం ఆ పార్టీని స్ధాపించారో అందుకు భిన్నంగా జరుగుతోందని ఆయన రెండు మూడు సార్లు ఆవేదన వ్యక్తం చేశారు. టికెట్ల కేటాయింపులో అల్లు అరవింద్ పెత్తనం, పార్టీలో అంతర్గత ప్రజాస్వామ్యం లోపించడం సమరంను బాధపెట్టినట్టు తెలుస్తోంది.

మాజీ ఐపిఎస్ అధికారి ఆంజనేయనేయ రెడ్డి కూడా పార్టీ వ్యవహారాలపై ఆగ్రహం వ్యక్తం చేయడం, చిరంజీవి ఆయనకు క్షమాపణ చెప్పుకోవడం తెలిసిందే. ప్రస్తుతానికి ఆంజనేయరెడ్డి మౌనంగా ఉన్నారు. పార్టీ అధికార ప్రతినిధులు, మూల స్తంభాలు అయిన డాక్టర్ మిత్రా, పరకాల ప్రభాకర్ లకు కూడా పార్టీలో ప్రాధాన్యం తగ్గిపోయింది. వారిద్దరికీ టికెట్లు లభించలేదు. వారు కూడా ప్రస్తుతానికి మౌన వ్రతంలో ఉన్నారు.