బాబు మారిన మనిషి: బర్దన్

వరంగల్‌: తెలుగుదేశం పార్టీ అధ్యక్షుడు నారా చంద్రబాబునాయుడు మారిన మనిషి అని, ఈసారి గెలిపిస్తే ప్రజలకు మేలు చేస్తారని సిపిఐ ప్రధాన కార్యదర్శి ఎబి బర్దన్ అన్నారు. తెలంగాణపై తమకు స్పష్టమైన వైఖరి ఉందని, మూడో ఫ్రంట్ అధికారంలోకి వస్తే తెలంగాణ రాష్ట్ర ఏర్పాటుకు చర్యలు తీసుకుంటామని ఆయన వరంగల్ జిల్లా మహబూబా బాద్ లో మీడియా ప్రతినిధులతో బుధవారంనాడు అన్నారు. రాష్ట్రంలో మహా కూటమి అధికారంలోకి వస్తుందని ఆయన ధీమా వ్యక్తం చేశారు.

ప్రజాధనాన్ని దుర్వినియోగం చేసి కాంగ్రెస్ అధ్యక్షురాలు సోనియా సభలకు జనాన్ని తరలించినా స్పందన రాలేదని, ప్రజల్లో ఆ పార్టీ అంటే ఉన్న అభిప్రాయానికి ఇది నిదర్శనమని బర్దన్‌ అన్నారు. సత్యం, మైటాస్‌ ముఖ్యమంత్రి వైయస్ రాజశేఖర రెడ్డి కంపెనీలకు మారు పేర్లన్నారు. తెలంగాణాపై కాంగ్రెస్‌కు స్పష్టమైన విధానం లేదని అన్నారు. కాంగ్రెస్‌ పార్టీని చిత్తుగా ఓడించాలని పిలుపునిచ్చారు.