విజయశాంతి పక్కన చంద్రబాబు

హైదరాబాద్: మెదక్ పార్లమెంటు స్థానానికి తెలంగాణ రాష్ట్ర సమితి (తెరాస) అభ్యర్థి విజయశాంతిని గెలిపించాలని తెలుగుదేశం పార్టీ అధ్యక్షుడు నారా చంద్రబాబునాయుడు ఓటర్లను కోరారు. ఆయన బుధవారం మెదక్ జిల్లాలో ఎన్నికల ప్రచారం నిర్వహించారు. అంతకు ముందు ఆయన విజయశాంతితో కలిసి మెదక్ చర్చిలో ప్రార్థనలు చేశారు. కాంగ్రెసు అవినితీ పాలనపై ఆయన తన ప్రచారంలో విరుచుకు పడ్డారు. తెలంగాణ ఇస్తామని చెప్పి కాంగ్రెసు మోసం చేసిందని ఆయన విమర్శించారు. ముఖ్యమంత్రి డాక్టర్ వైయస్ రాజశేఖర రెడ్డి అవినీతిలో కూరుకుపోయారని, ముఖ్యమంత్రి ఆస్తి లక్ష కోట్ల రూపాయలకు చేరుకుందని ఆయన అన్నారు.

తాము తెలంగాణ రాష్ట్ర ఏర్పాటుకు కట్టుబడి ఉన్నామని, తాము అధికారంలోకి రాగానే తెలంగాణ రాష్ట్ర ఏర్పాటుకు అన్ని చర్యలూ చేపడుతామని ఆయన చెప్పారు. తాము హామీ ఇచ్చిన నగదు బదిలీ పథకంతో ప్రజలు గట్టెక్కుతారని ఆయన చెప్పారు.కాంగ్రెసు ప్రభుత్వం అవినీతిలోనే అభివృద్ధి సాధించిందని, మరో అభివృద్ధి లేదని ఆయన అన్నారు. రైతుల బాకీలను తాము అధికారంలోకి రాగానే రద్దు చేస్తామని, రైతులు ఎవరూ బాకీలు చెల్లించవద్దని ఆయన అన్నారు.