చంద్రబాబుపై రాహుల్ విసుర్లు

విజయవాడ: తెలుగుదేశం పార్టీ అధ్యక్షుడు నారా చంద్రబాబు నాయుడిపై కాంగ్రెస్ పార్టీ నేత రాహుల్ గాంధీ పరోక్ష విసుర్లు విసిరారు. ఆంధ్రప్రదేశ్ లోని ఒక నాయకుడు వ్యవసాయం దండుగ అని అన్నాడని ఆయన గుర్తు చేశారు. తాము పేదల పక్షం వహిస్తామని ఆయన హామీ ఇచ్చారు. ఆంధ్రప్రదేశ్ తనకు పుట్టిల్లు లాంటిదని, తాను మళ్లీ ఆంధ్రప్రదేశ్ కు వస్తానని ఆయన చెప్పారు. గత ఐదేళ్లలో రాష్ట్ర ప్రభుత్వం బాగా పని చేసిందని ఆయన ప్రశంసించారు. కాంగ్రెసు పార్టీని గెలిపించాలని ఆయన ప్రజలను కోరారు. కృష్ణా జిల్లా మైలవరంలో ఆయన శుక్రవారం మాట్లాడారు.

తమకు, ప్రతిపక్షాలకు చాలా తేడా ఉందని, కాంగ్రెసు, ప్రతిపక్షాల ఆలోచనలకు మధ్య పొంతన లేదని, తాము దేశాన్ని సమగ్రంగా అభివృద్ధి చేయాలని కోరుకుంటున్నామని, ప్రతిపక్షాలు కొన్ని ప్రాంతాలపైనే దృష్టి పెడుతున్నాయని ఆయన అన్నారు. తమ పార్టీ నేతలు మన్మోహన్ సింగ్, సోనియా గాంధీల ఆలోచనలు ఈ దేశాభివృద్ధి కోసమేనని ఆయన అన్నారు. కాంగ్రెసు పేదల మేలు కోసం పనిచేస్తోందని ఆయన చెప్పారు. రుణాల మాఫీని, సమాచార హక్కు చట్టాన్ని, ఉపాధి హామీ పథకం చట్టాన్ని ఆయన ఈ సందర్భంగా ప్రస్తావించారు.