సోనియా ఏడవక తప్పదు: కెసిఆర్

హైదరాబాద్: ఎన్నికల తర్వాత కాంగ్రెస్ అధ్యక్షురాలు సోనియా గాంధీ ఏడవక తప్పదని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అన్నారు. మే 16వ తేదీ తర్వాత రాష్ట్రంలో మహాకూటమి ప్రభుత్వమే ఏర్పడుతుందని ఆయన అన్నారు. రంగారెడ్డి జిల్లా కుత్బుల్లాపూర్ లో ఆయన మంగళవారం ప్రచారం నిర్వహించారు. కాంగ్రెసుకు ఓటేస్తే మోరీలో వేసినట్లేనని ఆయన అన్నారు. కాంగ్రెసు పార్టీ ఓటమి పాలు కావడం ఖాయమని ఆయన అన్నారు.

ఆర్థిక మంత్రి కె.రోశయ్య లాంటి దద్దమ్మలు తమకు ప్రభుత్వ పథకాల గురించి వివరించాల్సిన అవసరం లేదని ఆయన వ్యాఖ్యానించారు. టీవీలు లేనివారెవరూ టీవీలు కొనవద్దని ఆయన ప్రజలకు చెప్పారు. మహా కూటమి ప్రభుత్వం ఏర్పడగానే కలర్ టీవీలు పంపిణీ చేస్తామని ఆయన చెప్పారు. సికింద్రాబాద్ లోకసభ సీటులో, మహేశ్వరం అసెంబ్లీ స్థానంలో తెలుగుదేశం పార్టీ అభ్యర్థులను బలపరచాలని తెరాస నిర్ణయించింది. దీంతో పోటీ నుంచి విరమించుకోవాలని కెసిఆర్ తెరాస అభ్యర్థులకు సూచించారు.