తిరుమల శ్రీవారి సేవలో వైయస్

తిరుపతి: ముఖ్యమంత్రి డాక్టర్ వైయస్ రాజశేఖర రెడ్డి శుక్రవారం ఉదయం తిరుమల శ్రీవారిని దర్శించుకున్నారు. విఐపి బ్రేక్ లో ఆయన శ్రీ వెంకటేశ్వర స్వామి దర్శనం చేసుకున్నారు. ఆయన రాత్రి తిరుమలలోని బస చేసి శుక్రవారం ఉదయం శ్రీవారిని దర్శించుకున్నారు. అంతకు ముందు ఆయన ఎఐసిసి ప్రధాన కార్యదర్శి రాహుల్ గాంధీకి వీడ్కోలు పలికారు. రేణిగుంట విమానాశ్రయం నుంచి రాహుల్ గాంధీ ఢిల్లీ బయలు దేరి వెళ్లారు.

రాహుల్ గాంధీతో పాటు ముఖ్యమంత్రి రాజశేఖర రెడ్డి గురువారం కర్నూలు, నెల్లూరు జిల్లాల్లో పర్యటించారు. కాంగ్రెసు పార్టీని గెలిపించాల్సిన అవసరాన్ని రాహుల్ తన ప్రసంగాల్లో ప్రజలకు వివరించారు. ముఖ్యమంత్రి మాత్రం రాయలసీమ, కోస్తా ప్రజలను రెచ్చగొట్టే ప్రయత్నం చేశారు. తెలంగాణ రాష్ట్రం ఏర్పడితే మన ప్రాజెక్టులకు నీరు రాదని ఆయన చెప్పుకొచ్చారు. రాజశేఖర రెడ్డి వ్యాఖ్యలు రాష్ట్రంలో తీవ్ర దుమారం రేపుతున్నాయి.