ఎస్పీ, ఆర్జెడీలతో విభేదాలు లేవు: ఎల్జెపి

న్యూఢిల్లీ‌: తమకు సమాజ్ వాదీ పార్టీ, రాష్ట్రీయ జనతా దళ్ లతో విభేదాలు ఉన్నట్లు వచ్చిన వార్తల్లో నిజం లేదని లోక్ జనశక్తి పార్టీ (ఎల్జెపి) స్పష్టం చేసింది. రాంపూర్ ర్యాలీకి ఈ నెల 11వ తేదీన తమ పార్టీ నేత రాం విలాస్ పాశ్వాన్ హాజరు కాకపోవడంతో మీడియాలో ఆర్జెడీ, ఎస్పీలతో విభేదాలు పొడసూపినట్లు వార్తలు వచ్చాయని, ఆ వార్తల్లో నిజం లేదని ఎల్జెపి సెక్రటరీ జనరల్ అబ్దుల్ ఖాలిక్ వివరించారు.

ఆ రోజు రాం విలాస్ పాశ్వాన్ కు వేరే కార్యక్రమాలున్నాయని, అయితే రాంపూర్ ర్యాలీకి తమకు ఆహ్వానం ఆలస్యంగా అందిందని, దాంతో పాశ్వాన్ ఆ ర్యాలీకి హాజరు కాలేకపోయారని ఆయన చెప్పారు. భవిష్యత్తు కార్యక్రమాన్ని ఖరారు చేసుకోవడానికి మూడు పార్టీల నాయకులు ఈ నెల 14వ తేదీన సమావేశమవుతారని ఆయన చెప్పారు. కేంద్రంలో లౌకిక ప్రభుత్వ ఏర్పాటుకు అనుసరించాల్సిన వ్యూహంపై వారు చర్చలు జరుపుతారని ఆయన చెప్పారు. బీహార్, జార్ఖండ్, ఉత్తరప్రదేశ్ శాసనసభ ఎన్నికల్లో కూడా ఈ మూడు పార్టీలు కలిసే పోటీ చేస్తాయని ఆయన చెప్పారు.