నేను చెప్పిందే అవుతుంది: కెసిఆర్

న్యూఢిల్లీ: ఎన్‌ డీఏ అధికారంలోకి వస్తుందన్న విషయం అద్దంలో మాదిరిగా స్పష్టంగా కనిపిస్తోందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అన్నారు. కాంగ్రెస్‌ అస్త్రసన్యాసం చేసిందని, తమ పని అయిపోయిందని రాహుల్‌ గాంధీ కూడా ఒప్పుకున్నారని ఆయన అన్నారు. ప్రభుత్వాన్ని ఏర్పాటు చేయాలన్న ఆతృతకానీ, ఆ దిశగా చొరవ చూపే ఆలోచనకానీ కాంగ్రెస్‌ లో కనిపించడంలేదని ఆయన అన్నారు. 2004లో యూపీఏ అధికారంలోకి వస్తుందని తాను చెప్పినప్పుడు ఢిల్లీ మీడియా అంతా నవ్విందని, తాను పరిస్థితులను బట్టే లెక్కలు చెబుతున్నానని, కాంగ్రెస్‌ కు సొంతంగా ఒక మేరకు స్థానాలొచ్చినా, దాని మిత్రులందరూ బలహీనపడిపోయారని ఆయన అన్నారు. యూపీఏ సాధించే సంఖ్య 150కి దరిదాపుల్లో ఆగిపోతుందని, ఎన్‌డీఏ సొంతంగా 225 సీట్లకు మించి గెలుచుకొనే పరిస్థితి కనిపిస్తోందని ఆయన చెప్పారు. ఇక తమ లాంటి కొత్తపార్టీలు కొన్ని ఉండనే ఉన్నాయని, తమ బలం మెజారిటీకి దరిదాపుల్లోనే ఉందని ఆయన అన్నారు. ఏ కోణంలో చూసినా ఎన్‌డీఏ ప్రభుత్వం రావడం ఖాయమమని, ఇంతకుముందు తాను చెప్పిందే జరిగిందని, ఇప్పుడు కూడా జరిగి తీరుతుందని కేసీఆర్‌ వ్యాఖ్యానించారు.బిజెపి సీనియర్ నేత ఎం. వెంకయ్యనాయుడిని మంగళవారం రాత్రి కలిసిన తర్వాత ఆయన మీడియా ప్రతినిధులతో మాట్లాడారు.

ఎన్‌ డీఏకు మద్దతివ్వడాన్ని కేసీఆర్‌ సమర్థించుకున్నారు. వామపక్షాలు తమకు బద్ధవ్యతిరేకి అయిన కాంగ్రెస్‌తో కలిసినప్పుడు, తాము ఎన్‌డీఏతో కలిస్తే తప్పెలా అవుతుందని ప్రశ్నించారు. మూడో కూటమిని ఊహలపల్లకిగా ఆయన అభివర్ణించారు. దానికి ఇంతవరకూ ఒక రూపమే రాలేదన్నారు. ఆదివారం లూధియానాలో జరిగిన ఎన్‌ డీఏ బహిరంగసభలో పాల్గొని ఢిల్లీకొచ్చిన కేసీఆర్‌ మంగళవారం బిజెపి సీనియర్‌ నేత వెంకయ్యనాయుడు, అద్వానీ రాజకీయ సలహాదారు సుధీంద్ర కులకర్ణిలతో వేర్వేరుగా భేటీ అయ్యారు. ఆయన మంగళవారం ఆర్‌ఎల్‌డీ అధినేత అజిత్‌ సింగ్‌తో కూడా అరగంట పాటు సమావేశం అయ్యారు. మొదట తన ఇంటికొచ్చిన సుధీంద్రకులకర్ణితో మాట్లాడిన తర్వాత వెంకయ్యనాయుడి ఇంటికి వెళ్లి ఆయనతో సమావేశమయ్యారు. వెంకయ్యతో జరిపిన భేటీ సందర్భంగా కేసీఆర్‌ వెంట ఆయన మేనల్లుడు హరీశ్‌రావ్‌ మాత్రమే ఉన్నారు. లూధియానా సభలోని అంశాలపై తాము మాట్లాడుకున్నట్లు కేసీఆర్‌, వెంకయ్య విలేకరులతో చెప్పారు. తెలుగుదేశం పార్టీని ఎన్‌డీఏలోకి తీసుకొస్తారా? అన్న ప్రశ్నకు కేసీఆర్‌ సమాధానం చెప్పలేదు.

తెలంగాణ సాధనకోసం కేసీఆర్‌ ఎన్‌ డీఏకు మద్దతు పలకడాన్ని వెంకయ్య ప్రశంసించారు. కేసీఆర్‌ది మంచి నిర్ణయమని ఆయన అన్నారు.. ''తెలంగాణ ఏర్పాటు లక్ష్యంతో తెరాస ఏర్పడిందని, వారిని కాంగ్రెస్‌ మోసం చేసిందని, వారి లక్ష్యం ఎన్‌ డీఏతో సాకారమవుతుందని తెలుసుకొని మంచి నిర్ణయం తీసుకున్నారని వెంకయ్య అన్నారు. యూపీఏ నుంచి ఒక్కొక్కరు వెళ్లిపోతుంటే తమ కూటమిలోకి కొత్తగా ఐఎన్‌ఎల్‌డీ, ఎజీపీ, ఆర్‌ ఎల్‌ డీ, గూర్ఖాఫ్రంట్‌, తెరాస వచ్చాయని గుర్తు చేశారు. మరికొందరు చేరే అవకాశం ఉందన్నారు.