చేతులు కలిపిన ఉభయ కమ్యూనిస్టు

హైదరాబాద్‌: తమ మధ్య నెలకొన్న విభేదాలను పక్కన పెట్టి రాష్ట్రంలోని ఉభయ కమ్యూనిస్టు పార్టీల నాయకులు గురువారం సిపిఐ కార్యాలయం మగ్దూం భవన్ లో సమావేశమయ్యారు. శాసనసభ ఎన్నికల్లో అనుసరించిన వ్యూహాలపై సిపిఐ, సిపిఎం నాయకులు ఇటీవలి కాలంలో పరస్పరం దుమ్మెత్తి పోసుకుంటున్న విషయం తెలిసిందే. సిపిఐ రాష్ట్ర కార్యదర్శి కె నారాయణ, సిపిఎం రాష్ట్ర కార్యదర్శి బివి రాఘవులు సమావేశమై రాబోయే గ్రేటర్ హైదరాబాద్ ఎన్నికల్లో అనుసరించాల్సిన వ్యూహంపై చర్చించుకున్నారు.

ప్రజాసమస్యలపై కలిసి పని చేయాలని నిర్ణయించుకున్నట్లు ఇరువురు నాయకులు సమావేశానంతరం ప్రకటించారు. సమావేశంలో తమ మధ్య నెలకొన్న విభేదాలపై కూడా చర్చించుకున్నట్లు, కొన్ని సమస్యలు పరిష్కారమైనట్లు వారు తెలిపారు. తెల్ల రేషన్ కార్డుల ఏరివేతలో అర్హులకు అన్యాయం జరిగితే సహించబోమని రాఘవులు ప్రభుత్వాన్ని హెచ్చరించారు. మీడియాపై దురుసుగా వ్యవహరించిన మంత్రి పార్థసారథి తీరుపై కమ్యూనిస్టు నాయకులు మండిపడ్డారు. ప్రతిపక్షాల పట్ల ప్రభుత్వం వ్యవహరిస్తున్న తీరు కూడా చర్చకు వచ్చినట్లు రాఘవులు చెప్పారు.