మంత్రి పార్థసారథిపై వైయస్ మండిపాటు

హైదరాబాద్‌: మీడియా ప్రతినిధులపై దాడి చేసిన పశు సంవర్థక శాఖ మంత్రి పార్థసారథిపై ముఖ్యమంత్రి డాక్టర్ వైయస్ రాజశేఖర రెడ్డి గురువారం మండిపడ్డారు. కృష్ణా జిల్లా పెనుమలూరులో విలేకరుల సమావేశానికి ఆహ్వానించి పార్థసారథి మీడియా ప్రతినిధులపై అసభ్యంగా ప్రవర్తించారు. వారిని బూతులు తిట్టినట్లు వార్తలు వచ్చాయి. దీనికి ముఖ్యమంత్రి గురువారం ప్రతిస్పందించారు. బాధ్యత గల పదవిలో ఉండి ఆ విధంగా వ్యవహరించడం సరి కాదని ఆయన మంత్రికి సూచించారు. ఇటువంటి సంఘటనలు పునరావృతమైతే సహించబోనని ఆయన హెచ్చరించారు.

రేపటి నుంచి శాసనసభా సమావేశాలు జరుగుతున్న నేపథ్యంలో ఆయన గురువారం మంత్రులతో భేటీ అయ్యారు. శాసనసభా సమావేశాల్లో జాగరూకతతో వ్యవహరించాలని ఆయన మంత్రులకు సూచించారు. ప్రభుత్వ ప్రతిష్టను దెబ్బ తీయాలని ప్రతిపక్షాలు ప్రయత్నిస్తున్నాయని, దాన్ని సమర్థంగా ఎదుర్కోవాలని ఆయన చెప్పారు. ఉద్దేశపూర్వకంగా సభను తప్పు దోవ పట్టించానని చంద్రబాబు లాగా చెప్పిన ప్రతిపక్ష నేత ఎవరూ లేరని ఆయన అన్నారు.