హరీష్, మల్లు మాటల యుద్ధం

హైదరాబాద్: శాసనసభ ఆవరణలోని మీడియా పాయింట్ వద్ద తెలంగాణ రాష్ట్ర సమితి (తెరాస) శాసనసభ్యుడు హరీష్ రావు, ప్రభుత్వ చీఫ్ విప్ మల్లు భట్టి విక్రమార్క గురువారం తీవ్ర వాగ్వివాదానికి దిగారు. ఒకరి పార్టీపై మరొకరు పరస్పర విమర్శలు గుప్పించుకున్నారు. శాసనసభ సమావేశాల ప్రారంభానికి ముందు తెరాస, కాంగ్రెసు సభ్యుల మధ్య వాగ్వివాదం చెలరేగింది. తెలంగాణ ప్రాంతంలోని పది జిల్లాలను కరువు ప్రాంతాలుగా ప్రకటించాలని తెరాస డిమాండ్ చేస్తోంది. నీళ్లు లేక రైతులు ఇబ్బందులు పడుతుంటే ప్రభుత్వం నిమ్మకు నీరెత్తినట్లు వ్యవహరిస్తోందని తెరాస విమర్శిస్తోంది. కరవుపై తెరాస సభ్యులు మాట్లాడుతున్న సమయంలో అక్కడికి మల్లు భట్టి విక్రమార్క వచ్చారు.

ప్రతిపక్షాలు అనవసర రాద్ధాంతం చేస్తున్నాయని భట్టి విక్రమార్క విమర్శించారు. ప్రతిపక్షాలపై ఆయన విరుచుకుపడ్డారు. కరువు పరిస్థితులను ప్రతిపక్షాలు రాజకీయం చేస్తున్నాయని ఆయన అన్నారు. సమస్య పరిష్కారానికి ప్రతిపక్షాలు ప్రభుత్వంతో సహకరించాలని ఆయన కోరారు. ప్రచారం కోసం ప్రతిపక్షాలు అనవసర రాద్ధాంతం చేస్తున్నాయని ఆయన అన్నారు. ఈ సమయంలో హరీష్ రావుకు, మల్లు భట్టి విక్రమార్కకు మధ్య వాగ్వివాదం చెలరేగింది.