వసుంధరకు ఎమ్మెల్యేల మద్దతు

న్యూఢిల్లీ: వసుంధర రాజేకు వ్యతిరేకంగా తీసుకున్న భారతీయ జనతా పార్టీ (బిజెపి) అధ్యక్షుడు రాజ్ నాథ్ సింగ్ కు వ్యతిరేకత ఎదురవుతోంది. రాజస్థాన్ శాసనసభ ప్రతిపక్ష పదవి నుంచి దిగిపోవాలని రాజ్ నాథ్ సింగ్ వసుంధర రాజేను ఆదేశించారు. ఈ ఆదేశానికి వ్యతిరేకంగా, వసుంధ రాజేకు మద్దతుగా 57 మంది శాసనసభ్యులు నిలవడ్డారు. ఆదేశాలను వెనక్కి తీసుకోవాలని కోరడానికి వారు రాజ్ నాథ్ సింగ్ నివాసానికి చేరుకున్నారు.

ఈ 57 మంది శాసనసభ్యులు బిజెపి అగ్రనేత ఎల్ కె అద్వానీని కూడా కలిసే అవకాశం ఉంది. వారితో పాటు వసుంధర రాజే కూడా అద్వానీని కలిసే అవకాశం ఉంది. ఇటీవలి లోకసభ ఎన్నికల్లో పార్టీ అపజయానికి గురైనప్పటి నుంచి ప్రతిపక్ష పదవి నుంచి దిగిపోవాలని వసుంధర రాజే పై పార్టీ అధిష్ఠానవర్గం నుంచి ఒత్తిడి వస్తోంది. రాజస్థాన్ లోని 25 లోకసభ స్థానాల్లో పార్టీ నాలుగు సీట్లు మాత్రమే గెలుచుకోగలిగింది.