విపక్షాల మాటలు ఉత్తివే: వైయస్

హైదరాబాద్: రాష్ట్రంలో రైతుల మరణాలపై ప్రతిపక్షాలు చేస్తున్న విమర్శల్లో వాస్తవం లేదని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. ప్రతిపక్షాలు అనవసర రాద్ధాంతం చేస్తున్నాయని ఆయన అన్నారు. రాష్ట్రంలో కరవు పరిస్థితిపై ఆయన శుక్రవారం ఉన్నతాధికారులతో సమీక్ష నిర్వహించారు. కరువు వల్ల రాష్ట్రంలో 70 మంది రైతులు మరణించారని ప్రతిపక్షాలు చేస్తున్న విమర్శల్లో నిజం లేదని, తమకు అందిన నివేదిక ప్రకారం జులై నెలాఖరు వరకు కేవలం 15 మంది మాత్రమే చనిపోయారని, వారు కూడా కరవు వల్ల మరణించలేదని ఆయన అన్నారు.

రాష్ట్రంలో నెలకొన్న కరవు పరిస్థితిని ఎప్పటికప్పుడు తెలుసుకునేందుకు ఈ నెల 19వ తేదీనాటికి అన్ని జిల్లాల్లో హెల్ప్ లైన్లు ఏర్పాటు చేయనున్నట్లు ఆయన తెలిపారు. రైతులతో నేరుగా మాట్లాడేందుకు రచ్చబండ కార్యక్రమం నిర్వహిస్తామని ఆయన చెప్పారు. తాగునీటి సమస్యపై, పశుగ్రాసం కొరతపై కూడా ఆయన సమావేశంలో సమీక్షించారు.