శ్రీవారి నగలపై బిజెపి ధర్నా

తిరుపతి: శ్రీవారి నగలను కాపాడాలని కోరుతూ భారతీయ జనతా పార్టీశనివారం తిరుపతి తిరుమల దేవస్థానం (టిటిడి) పరిపాలనా భవనం ముందు ధర్నా చేసింది. తిరుపతిలోని కోదండరామాలయంలో వెలుగు చూసిన నగల తాకట్టు వ్యవహారంపై బిజెపి, బిజెవైయం నాయకులు తీవ్ర ఆందోళన వ్యక్తం చేశారు. ప్రతి ఆరునెలలకు ఒకసారి నగలను తనిఖీ చేయాల్సిన ఉన్నతాధికారులు, ఆభరణాలన్నీ ఉన్నాయో లేదో చూడాల్సిన తనిఖీల విభాగం అధికారులు నిర్లక్ష్యం వహించడం వల్లనే ఇటువంటి సంఘటనలు జరుగుతున్నాయని వారు విమర్శించారు.

ఆలయాల నుంచి ఏ వస్తువు కూడా బయటకు వెళ్లకుండా కాపలా కాయాల్సిన నిఘా, భద్రతా విభాగం వైఫల్యం, చేతకాని తనం తాజా సంఘటనకు నిదర్శనమని వారన్నారు. ఇటువంటి సంఘటనల వల్ల భక్తుల మనోభావాలు దెబ్బ తింటాయని వారు అభిప్రాయపడ్డారు. ఇటువంటి సంఘటనలు పునరావృతం కాకుండా ప్రభుత్వం తగిన చర్యలు తీసుకోవాలని వారు కోరారు.