11 శ్రీవారి నగల తాకట్టు

తిరుపతి: తిరుపతిలోని కోదండ రామాలయంలోని 11 శ్రీవారి నగలను ప్రధానార్చకుడు తాకట్టు పెట్టినట్లు దర్యాప్తులో తేలింది. శ్రీవారి నగల తాకట్టు వ్యవహారంపై పోలీసులు కేసు దర్యాప్తు చేస్తున్నారు. అర్చకుడు చిన వెంకటరమణ దీక్షితులు రెండేళ్లలో 11 హారాలు కుదువ పెట్టినట్లు దర్యాప్తులో తేలింది. వీటిలో నాలుగు హారాలను రెండు నెలల కిందట విడిపించాడు. అర్చకుని ఆధ్వర్యంలో ఇంకా 30 హారాలు ఉన్నట్లు తెలుస్తోంది.

తాకట్టులో ఉన్న 7 హారాలను స్వాధీనం చేసుకున్నట్లు తిరుమల తిరుపతి దేవస్థానం చీఫ్ విజిలెన్స్ అధికారి రామకృష్ణారావు చెప్పారు. బంగారం తాకట్టు పెట్టుకున్న సాగర్ లాల్ అనే వ్యాపారిని పోలీసులు అదుపులోకి తీసుకున్నట్లు తెలుస్తోంది. చెన్నైలో కూడా కొన్ని హారాలను అర్చకుడు కుదువ పెట్టినట్లు తెలుస్తోంది.

కోదంరరామస్వామి ఆలయ వ్యవహారం వెలుగు చూసిన నేపథ్యంలో టిటిడి ఇవో కృష్ణారావు స్థానిక ఆలయాల అర్చకులు, అధికారులతో శనివారం ఉదయం సమావేశమయ్యారు. స్థానిక ఆలయాల్లో ఆభరణఆల భద్రతపై, అవి ఎవరి ఆధీనంలో ఉంచాలనే విషయంపై సమావేశంలో చర్సించారు. స్థానిక ఆలయాల్లోని ఆభరణాలు లెక్కలు మరోసారి చూసుకోవాలని అధికారులు భావిస్తున్నారు.