సభా సంఘానికి వైయస్ 'నో'

హైదరాబాద్: ఇందిరమ్మ గృహాల్లో అక్రమాలపై సభా సంఘం వేయడానికి ముఖ్యమంత్రి డాక్టర్ వైయస్ రాజశేఖర రెడ్డి నిరాకరించారు. రాష్ట్ర వ్యాప్తంగా అక్రమాలు జరగనందున సభా సంఘం విచారణ అవసరం లేదని ఆయన అన్నారు. ఇందిరమ్మ గృహాల్లో అక్రమాలపై సభా సంఘం వేయాలని తెలుగుదేశం సభ్యులతో పాటు ఇతర ప్రతిపక్షాలు కూడా సోమవారం శాసనసభలో డిమాండ్ చేశాయి. అక్కడక్కడా అక్రమాలు జరిగి ఉండవచ్చునని, అటువంటి సంఘటనలను తమ దృష్టికి తెస్తే చర్యలు తీసుకుంటామని ముఖ్యమంత్రి హామీ ఇచ్చారు.

ఇందిరమ్మ గృహాలపై ఈ రోజు నుంచి పరిశీలన జరుగుతోందని, ఈ పరిశీలన సందర్భంగా శాసనసభ్యులు తమ తమ నియోజకవర్గాల్లోని అక్రమాలపై తమ దృష్టికి తేవాలని ఆయన అన్నారు. అక్రమాలు జరిగితే సహించేది లేదని, ప్రతి పైసా వసూలు చేస్తామని ఆయన చెప్పారు. పనికి ఆహార పథకం కింద తెలుగుదేశం ప్రభుత్వ హయంలో ఆ పార్టీ కార్యకర్తలు మాత్రమే లబ్ధి పొందారని, సైకిళ్లపై తిరిగేవారు కార్లు కొనుక్కున్నారని ఆయన ఆరోపించారు. ఇందిరమ్మ గృహాలపై ఇంటింటికీ తిరిగి పరిశీలన చేస్తామని ఆయన చెప్పారు.