అగ్ని కీలల్లో రాష్ట్ర హైకోర్టు

హైదరాబాద్: రాష్ట్ర రాజధాని హైదరాబాదులోని రాష్ట్ర హైకోర్టు మంటల్లో చిక్కుకుంది. సోమవారం తెల్లవారు జామున హైకోర్టు భవనంలో మంటలు లేచాయి. షార్ట్ సర్క్యూట్ వల్లనే ఈ అగ్ని ప్రమాదం సంభవించినట్లు భావిస్తున్నారు. నాలుగు ఫైరింజన్లు మంటలను ఆర్పడానికి ప్రయత్నిస్తున్నాయి. మంటల్లో లైబ్రరీ, ఒకటో బ్లాక్ తగలబడినట్లు తెలుస్తోంది. లైబ్రరీ హాల్ తగలబడలేదని, బార్ అసోసియేషన్ కార్యాలయం తగలబడిందని న్యాయవాదులు కొంత మంది అంటున్నారు.

సంఘటనా స్థలానికి న్యాయశాఖ మంత్రి, అదనపు డిజి, హైకోర్టు రిజిస్ట్రార్ చేరుకున్నారు. సహాయక చర్యలను వారు పర్యవేక్షిస్తున్నారు. అయితే, కోర్టు భవనంలో ఏ మేరకు దగ్ధం జరిగిందనేది సరైన సమాచారం అందడం లేదు. లోపలికి ఎవరినీ వెళ్లనీయడం లేదు. ఈ భవనాన్ని నిజాం ప్రభుత్వ హయంలో 1919లో నిర్మించారు. అప్పటి నుంచి కూడా హైకోర్టు ఈ భవనంలోనే సాగుతోంది. విద్యుత్ వైరింగ్ విషయంలో ఏ మాత్రం జాగ్రత్తలు తీసుకోవడం లేదనే విమర్సలు వినిపిస్తున్నాయి.