క్రియాశీలక రాజకీయాల్లో పర్వేజ్

ఇస్లామాబాద్: పాకిస్తాన్ మాజీ అధ్యక్షుడు పర్వేజ్ ముషార్రఫ్ ఈ ఏడాది నవంబర్ 30వ తేదీ నుంచి పాకిస్తాన్ క్రియాశీలక రాజకీయాల్లోకి వస్తారని అంటున్నారు. ప్రభుత్వ పదవిని చేపట్టకుండా ఆయనపై రెండేళ్ల పాటు విధించిన నిషేధం అప్పటికి పూర్తవుతుంది. ముషార్రఫ్ పిఎంల్- క్యూ పార్టీకి చెందిన వివిధ గ్రూపులను ఐక్యం చేసి వాటిని ఒకే వేదిక మీదికి తేవడం ద్వారా క్రియాశీలక రాజకీయాల్లో ఆయన పాలు పంచకుంటారని పిఎంల్ - క్యూ నాయకుడు చౌదరి షాభాజ్ చెప్పారు.

చౌదరి గతవారం సౌదీ అరేబియాలో ముషార్రఫ్ ను కలిసి సంప్రదింపులు జరిపారు. నవంబర్ 30వ తర్వాత ముషార్రఫ్ తన భవిష్యత్తు కార్యక్రమాన్ని ప్రకటిస్తారని చౌదరి చెప్పారు. ఏప్రిల్ నెల మధ్య నుంచి ముషార్రఫ్ పాకిస్తాన్ వెలుపలే ఉంటున్నారు. ముషార్రఫ్ విధించిన అత్యవసర పరిస్థితి రాజ్యాంగ విరుద్దమని సుప్రీంకోర్టు ప్రకటించడంతో ఆయన కష్టాలు మొదలయ్యాయి.