అర్ధశతాబ్దపు శాపం! దేశానికే పెద్ద ముప్పుగా మారిన రాక్షస చేప
అది 1974వ సంవత్సరం. జర్మనీకి చెందిన రోలాండ్ లోర్కోవ్స్కీ అనే ఒక సాధారణ జాలరి సరదాగా స్పెయిన్ లోని 'ఎబ్రో' నదిలో కొన్ని వేల సంఖ్యలో కేవలం బొటనవేలంత ఉన్న చిన్న పిల్ల చేపలను వదిలాడు. చేపల వేటను పెంచాలనే ఉద్దేశంతోనే అతను ఆ పని చేశాడు. కానీ, సరిగ్గా యాభై ఏళ్ల తర్వాత అదే చిన్న పని ఇప్పుడు స్పెయిన్ దేశ పర్యావరణ వ్యవస్థను చిన్నాభిన్నం చేసే ఒక పెద్ద జల విలయంగా మారింది. నాటి చిన్న చేపలు నేడు 'వెల్స్ క్యాట్ఫిష్' అనే రాక్షస ఆకారంలోకి మారి, స్థానిక జీవజాలాన్ని గుటకలేస్తూ నదీ గర్భంలో శాసించే క్రూర మృగాలుగా అవతరించాయి.
అత్యాశతో పెరిగిన జల రాక్షసుడు
ఈ 'వెల్స్ క్యాట్ఫిష్' సాధారణ చేప కాదు. ఐరోపాలోనే అత్యంత పెద్ద మంచినీటి చేపగా దీనికి పేరుంది. ఇవి ఏకంగా 8 నుంచి 9 అడుగుల పొడవు, దాదాపు 200 కిలోల వరకు బరువు పెరుగుతాయి. వీటి ఆకలి దాహం కూడా అంతే విచిత్రంగా ఉంటుంది. తమ శరీర బరువులో రోజుకు 5 శాతం మేర ఆహారాన్ని ఇవి నమలకుండా మింగేస్తాయి. నదిలోని చిన్న చేపలు, కప్పలు, నీటి పక్షులతో పాటు దారి తప్పి నీటి ఒడ్డుకు వచ్చే చిన్న చిన్న జంతువులను కూడా ఇవి వదలకుండా వేటాడి తినేస్తాయి.
స్థానిక జీవులకు మరణశాసనం
అమ్మకానికి, ఆహారానికి ఉపయోగపడే సాల్మన్ వంటి అరుదైన చేపల జాతులను ఈ రాక్షస చేపలు ఏరికోరి తినేస్తుండటంతో, స్పెయిన్ నదుల్లో స్థానిక చేపల సంతతి నామరూపాల్లేకుండా పోయే ప్రమాదం ఏర్పడింది. దీనిపై పరిశోధనలు చేసిన యూనివర్సిటీ ప్రొఫెసర్లు ఈ పరిస్థితిని ఒక 'టైమ్ బాంబు'తో పోలుస్తున్నారు. ఈ నదుల్లోని జీవులకు ఇంతటి భారీ పరిమాణంలో ఉండే వేటాడే చేపలను తట్టుకునే శక్తి గానీ, తప్పించుకునే సామర్థ్యం గానీ లేకపోవడమే దీనికి ప్రధాన కారణం.
పూర్తిగా నిర్మూలించడం అసాధ్యం!
ఈ చేపలను నదుల నుంచి పూర్తిగా తొలగించడం లేదా వేటాడి అంతం చేయడం ఇప్పుడు ఏమాత్రం సాధ్యం కాదని అధికారులు చేతులెత్తేశారు. నదులలో ఇవి విపరీతంగా గుడ్లు పెడుతూ తమ సంతతిని కోట్లలోకి పెంచుకున్నాయి. దానికితోడు గ్లోబల్ వార్మింగ్ వల్ల నదీ జలాల ఉష్ణోగ్రతలు పెరగడంతో, ఈ వేడి నీరు క్యాట్ఫిష్లకు మరింత అనుకూలంగా మారి స్పెయిన్ నుంచి పక్కనే ఉన్న బెల్జియం, నెదర్లాండ్స్ దేశాల నదులకూ వేగంగా విస్తరిస్తున్నాయి. అర్ధశతాబ్దం క్రితం ఒక వ్యక్తి చేసిన చిన్న పొరపాటు, నేడు ఐరోపా ఖండం నదుల మనుగడకే పెద్ద సవాలుగా పరిణమించింది.
Click it and Unblock the Notifications
Sign in with Google