రోశయ్య మాట వింటున్నాం: ఆనం

హైదరాబాద్: ముఖ్యమంత్రి కె రోశయ్యకు మంత్రులు సహకరించడం లేదని వచ్చిన వార్తలను మంత్రి ఆనం రామనారాయణ రెడ్డి ఖండించారు. తాము ముఖ్యమంత్రికి పూర్తిగా సహకరిస్తున్నట్లు ఆయన స్పష్టం చేశారు. మంత్రులు రోశయ్యకు సహకరించడం లేదని వార్తలు రావడంతో నష్టనివారణకు ఆయన గురువారం మీడియా ప్రతినిధుల సమావేశం ఏర్పాటు చేసి వివరణ ఇచ్చారు. మీడియాలో వస్తున్న వార్తలు చాలా బాధాకరంగా ఉన్నాయని, ముఖ్యమంత్రి రోశయ్య నాయకత్వంలో తాము ప్రజలకు జవాబుదారీగా ఉండడానికి పని చేస్తున్నామని ఆయన చెప్పారు. తాము పూర్తిగా రోశయ్యకు సహకరిస్తున్నామని ఆయన చెప్పారు.

పార్టీ అధిష్ఠాన వర్గం సూచన మేరకు రోశయ్య నాయకత్వం చేపట్టారని, ప్రభుత్వాన్ని ముందుకు నడిపించాల్సిన బాధ్యత తమపై ఉందని ఆయన అన్నారు. వైయస్ మృతి షాక్ నుంచి రాష్ట్రం ఇప్పుడిప్పుడే బయట పడుతోందని ఆయన చెప్పారు.తామంతా ఒక్క మాట మీద ఉన్నామని ఆయన చెప్పారు. తాము రోశయ్యకు పూర్తిగా సహకరిస్తున్నామని సబితా ఇంద్రారెడ్డి, కోమటిరెడ్డి వెంకటరెడ్డి, తదితర మంత్రులు స్పష్టం చేశారు. రోశయ్యపై తమకు అపారమైన గౌరవం ఉందని వారు చెప్పారు.