మాయావతిపై సుప్రీం ఆగ్రహం

న్యూఢిల్లీ: ఉత్తర ప్రదేశ్ ముఖ్యమంత్రి మాయావతిపై సుప్రీంకోర్టు శుక్రవారం తీవ్ర ఆగ్రహం వ్యక్తం చేసింది. లక్నోలోని స్మారక పార్కుల్లో అన్ని నిర్మాణాలను ఆరు గంటల్లోగా నిలిపేయాలని సుప్రీంకోర్టు మాయావతి ప్రభుత్వాన్ని ఆదేశించింది. బిఆర్ అంబేడ్కర్, కాన్షీరాం విగ్రహాల నిర్మాణాలను ఆపేయాలని సుప్రీంకోర్టు ఆదేశించింది. లక్నోలోని నిర్మాణ స్థలాల నుంచి యంత్రాలను తొలగించాలని కూడా ఆదేశించింది.

పన్ను చెల్లింపుదారుల డబ్బుల వినియోగించి విగ్రహాలు స్థాపించడానికి వీలు లేదని సుప్రీంకోర్టు మంగళవారం మాయావతి ప్రభుత్వాన్ని ఆదేశించింది. విగ్రహాల నిర్మాణాన్ని ఆపేయాలని కూడా ఆదేశించింది. నిర్మాణాలను నిలిపేయడానికి మాయావతి ప్రభుత్వం అంగీకరించింది. అయితే ఆచరణలో నిర్మాణాలను ఆపేయలేదు. దీనిపై సుప్రీంకోర్టు శుక్రవారం తీవ్రంగా ప్రతిస్పందించింది. తమ ఆదేశాలను ఎందుకు ధిక్కరించారంటూ సుప్రీంకోర్టు ఉత్తరప్రదేశ్ ప్రభుత్వ ప్రధాన కార్యదర్శికి షోకాజ్ నోటీసు జారీ చేసింది.