గుజరాత్: బిజెపికి నాలుగు సీట్లు

అహ్మదాబాద్: గుజరాత్ లోని ఏడు శాసనసభ సీట్లకు జరిగిన ఉప ఎన్నికల్లో బిజెపి నాలుగు స్థానాల్లో విజయం సాధించింది. ఈ నెల 10వ తేదీన పోలింగ్ జరగగా సోమవారం ఓట్ల లెక్కింపు జరిగింది. మరో స్థానంలో ఆధిక్యంలో కొనసాగుతోంది. కాంగ్రెస్ ధోరజీ, కొడినార్ స్థానాల్లో విజయం సాధించింది. సాయంత్రం వరకు కూడా దాంతా స్థానం ఓట్ల లెక్కింపు సాగుతూనే ఉంది. బిజెపి అభ్యర్థి ఆధిక్యతలో కొనసాగుతున్నారు.

ఇటీవల జరిగిన లోకసభ ఎన్నికల్లో బిజెపి చతికలబడింది. ప్రస్తుత ఉప ఎన్నికలు బిజెపి తిరిగి ప్రాణం పోసినట్లయింది. ఈ విజయాన్ని బట్టి ప్రజలు తమ పార్టీ వైపే చూస్తున్నారని తేలిపోయిందని బిజెపి ప్రధాన కార్యదర్శి జయంతీ బారోట్ అన్నారు. ఈ ఉప ఎన్నికల్లో బిజెపి ముఖ్యమంత్రి నరేంద్ర మోడీ ప్రచారం కూడా చేయలేదు.