వైయస్ పై లోకనాయకుడు సినిమా

హైదరాబాద్: దివంగత ముఖ్యమంత్రి వైయస్ రాజశేఖర రెడ్డి జీవితం ఆధారంగా సినిమా రూపుదిద్దుకోబోతోంది. ఈ సినిమాకు లోకనాయకుడు అని పేరు ఖరారు చేసినట్లు సమాచారం. ఈ సినిమాకు పూరీ జగన్నాధ్ దర్శకత్వం వహించడానికి అంగీకరించినట్లు చెబుతున్నారు. కాగా, సినిమాలో వైయస్ రాజశేఖర రెడ్డి పాత్రను రాజశేఖర్ పోషిస్తున్నారు. ఇద్దరూ రాజశేఖర్లే కావడం, ఇద్దరు కూడా డాక్టర్లు కావడం విశేషం. రాజశేఖర్ వైయస్ రాజశేఖర్ రెడ్డికి వీరాభిమానిగా మారిన విషయం తెలిసిందే.

సోమవారంనాడు పూరీ జగన్నాథ్ దివంగత నేత వైయస్ రాజశేఖర రెడ్డి కుమారుడు జగన్ ను పరామర్శించారు. ఈ సందర్భంగా వైయస్ జీవితం ఆధారంగా నిర్మించే చిత్రం ప్రస్తావన వచ్చినట్లు సమాచారం. కాగా, అలనాటి నటీమణులు శారద, జమున తదితరులు కూడా సోమవారం వైయస్ జగన్ ను పరామర్సించినవారిలో ఉన్నారు.