సిఎంగా జగన్ ను చూడాలి: కన్నా

కడప: ముఖ్యమంత్రిగా వైయస్ జగన్ ను చూడాలని ఉందని మంత్రి కన్నా లక్ష్మినారాయణ అన్నారు. అదే విషయాన్ని తాము కాంగ్రెసు పార్టీ అధ్యక్షురాలు సోనియా గాంధీకి చెప్పినట్లు ఆయన తెలిపారు. మంగళవారంనాడు ఆయన కడప జిల్లా ఇడుపుల పాయలో వైయస్ జగన్ ను పరామర్శించారు. జగన్ ముఖ్యమంత్రి కావాలని కోరుకుంటున్నారని ఆయన అన్నారు. తాము ముఖ్యమంత్రి రోశయ్యతో కలిసి పనిచేస్తున్నామని, రోశయ్యకు సహకరిస్తున్నామని, కానీ జగన్ ముఖ్యమంత్రి కావాలనేది మాత్రం తమ కోరిక అని ఆయన అన్నారు.

జగన్ ను ఎప్పుడు ముఖ్యమంత్రిని చేస్తారని ప్రజలు తమను అడుగుతున్నారని ఆయన అన్నారు. పార్టీ అధిష్ఠాన వర్గానికి తమ అభిప్రాయం చెప్పాలని వారంటున్నట్లు ఆయన తెలిపారు. డాక్టర్ వైయస్ రాజశేఖర రెడ్డి ఆశయాలను నెరవేర్చేందుకు జగన్ ను ముఖ్యమంత్రిని చేయాలని ప్రజలు కోరుకుంటున్నారని వారన్నారు. మరో మంత్రి పితాని సత్యనారాయణ కూడా అదే అభిప్రాయాన్ని వెల్లడించారు. ఆయన కూడా జగన్ ను పరామర్శించారు. తణుకు శాసనసభ్యుడు కారుమూరి నాగేశ్వరరావు కూడా జగన్ నాయకత్వాన్ని సమర్థించారు. రాష్ట్రానికి, పార్టీకి జగన్ నాయకత్వం అవసరం ఎంతో ఉందని కడప జిల్లా పరిషత్ చైర్ పర్సన్ జ్యోతి రెడ్డి అన్నారు.