రాహుల్ గాంధీ పర్యటనపై మాయావతి గుర్రు

లక్నో: కాంగ్రెసు నేత రాహుల్ గాంధీ ఉత్తరప్రదేశ్ ఆకస్మిక పర్యటనపై ముఖ్యమంత్రి మాయావతి గుర్రుగా ఉన్నారు. పార్టీ సీనియర్ నేతలు, అధికారులు ధృవీకరించుకనే లోగానే రాహుల్ గాంధీ బుధవారం తన ఉత్తరప్రదేశ్ పర్యటనను ముగించుకుని వెళ్లిపోయారు. ప్రత్యేక భద్రత ఏదీ లేకుండా రాహుల్ గాంధీ పర్యటించడంపై మాయావతి ప్రభుత్వం కేంద్ర ప్రభుత్వానికి ఫిర్యాదు చేసేందుకు సిద్ధపడుతోంది. ఎస్పీజీపై కేంద్రం దృష్టికి రాహుల్ వ్యవహారాన్ని తీసికెళ్తామని ఉత్తరప్రదేశ్ ఉన్నతాధికారులు అంటున్నారు.

రాహుల్ గాంధీ పర్యటన గురించి తెలిసిన వెంటనే రాష్ట్ర అధికారులు ఆరు గంటల పాటు ఆయన ఆచూకీని కనుక్కోవడానికి నానా తంటాలు పడ్డారు. కానీ లాభం లేకపోయింది. రాహుల్ గాంధీ విమానాశ్రయంలో కొంత మంది చూడడంతో విషయం బయటకు పొక్కింది. ఇన్నోవాలో రాహుల్ తన ఎస్పీజీ ద్వారా ప్రయాణించారు. సాయంత్రం నాలుగు గంటలకు బారాబంకి జిల్లాలోని రాంనగర్ లో రాహుల్ కనిపించారు. ఆ తర్వాత బహ్రెయిచ్ లో దర్శనమిచ్చారు. రోడ్డు పక్కన ఉన్న గ్రామస్థులతో మాట్లాడి మున్షీగంజ్ వైపు వెళ్లారు.