కలవకుండా ఎలా ఉంటా: కెవిపి రామచందర్ రావు

న్యూఢిల్లీ: పార్టీ అధిష్టానానికి చెందిన నాయకులను తాను కలుసుకుంటానని దివంగత ముఖ్యమంత్రి వైయస్ రాజశేఖర రెడ్డి తనయుడు, కాంగ్రెసు రాజ్యసభ సభ్యుడు కెవిపి రామచందర్ రావు చెప్పారు. పార్లమెంటరీ స్టాండింగ్ కమిటీ సమావేశానికి హాజరు కావడానికి ఆయన మంగళవారం ఢిల్లీ వచ్చారు. ఈ సందర్భంగా మీడియా ప్రతినిధులతో నర్మగర్భంగా మాట్లాడారు. సమావేశంలో పాల్గొనడానికే వచ్చారా, అధిష్టానం నేతలను కలుస్తారా అని మీడియా ప్రతినిధులు అడిగితే ఢిల్లీకి వచ్చిన తర్వాత కలవకుండా ఎలా ఉంటానని ఆయన జవాబిచ్చారు.

సోనియా గాంధీ నిర్ణయం శిరోధార్యం అని జగన్ ప్రకటించిన తర్వాత పరిస్థితి కొలిక్కి వచ్చిందని భావించిన తరుణంలో మళ్లీ వాతావరణం వేడెక్కింది. జగన్ వర్గీయులు ముఖ్యమంత్రి పదవి కోసం పట్టుబడుతుండడంతో అనూహ్య పరిణామాలు చోటు చేసుకుంటున్నాయి. ఈ పరిస్థితిని కెవిపి రామచందర్ రావు పార్టీ అధిష్టానానికి వివరించే అవకాశం ఉంది. సోనియాగాంధీ రాజకీయ సలహాదారు అహ్మద్ పటేల్, కేంద్ర మంత్రులు ప్రణబ్ ముఖర్జీ, వీరప్ప మొయిలీలను ఆయన కలిసే అవకాశం ఉందని అంటున్నారు.