నేను దిగ్భ్రాంతి చెందాను: జగన్

హైదరాబాద్: కాంగ్రెసు లెజిస్లేచర్ పార్టీ (సిఎల్పీ) సమావేశం ఏర్పాటు చేయకపోతే రాజీనామాలు చేస్తామని కొంత మంది శాసనసభ్యులు చేసిన ప్రకటనలను చూసి తాను దిగ్భ్రాంతి చెందానని దివంగత ముఖ్యమంత్రి వైయస్ రాజశేఖర రెడ్డి తనయుడు, కడప పార్లమెంటు సభ్యుడు వైయస్ జగన్మోహన్ రెడ్డి అన్నారు. ఈ మేరకు ఆయన బుధవారం ఒక పత్రికా ప్రకటన విడుదల చేశారు. అటువంటి చర్యలకు పాల్పడకుండా సంయమనం పాటించాలని ఆయన శాసనసభ్యులను కోరారు.

రాష్ట్రంలోని పరిస్థితులన్నీ తమ కాంగ్రెసు పార్టీ అధిష్ఠానానికి తెలుసునని ఆయన అన్నారు. పార్టీ అధినాయకత్వం నిర్ణయమే మనందరికీ శిరోధార్యమని ఆయన అన్నారు. పార్టీ అధిష్ఠానాన్ని ఇబ్బందులు పెట్టే చర్యలు క్రమశిక్షణ గల కార్యకర్తలకు తగదని ఆయన హితవు చెప్పారు.