వరదలో చిక్కుకున్నవారిని హెలికాప్టర్లతో రక్షిస్తాం: రఘువీరా

హైదరాబాద్: వరద నీటిలో చిక్కుకున్నవారిని హెలికాప్టర్ల సాయంతో రక్షిస్తామని, వారిని సురక్షితంగా ప్రాంతాలకు తరలిస్తామని వ్యవసాయ శాఖ మంత్రి ఎన్. రఘువీరా రెడ్డి హామీ ఇచ్చారు. ముఖ్యమంత్రి కె. రోశయ్య ఆదేశాల మేరకు ఆయన శుక్రవారం ఉదయం అనంతపురం నుంచి కర్నూలు జిల్లాకు బయలుదేరుతూ మీడియా ప్రతినిధులతో మాట్లాడారు. ఇప్పటికే ఆరు హెలికాప్టర్లు సిద్ధంగా ఉన్నాయని ఆయన చెప్పారు. రహదారిలో రాకపోకలు స్తంభించడంతో మంత్రాలయం మండలం రాంపురం గ్రామంలో వరద నీటిలో చిక్కుకున్న శాసనసభ్యుడు బాలినాగిరెడ్డిని, ఇతరులను తరలించడం కష్టంగా ఉందని, వారిని హెలికాప్టర్ల సాయంతో సురక్షిత ప్రాంతానికి తరలిస్తామని ఆయన చెప్పారు . వరద బాధితులకు మంచినీరు, ఆహార పొట్లాలు అందిస్తామని ఆయన చెప్చారు.

ఇంత ప్రమాదం ఇంతకు ముందు ఎప్పుడూ సంభవించలేదని రెవెన్యూ మంత్రి ధర్మాన ప్రసాదరావు అన్నారు. కర్నూలుకు వరద ప్రమాదం ఇంకా తొలగి పోలేదని ఆయన అన్నారు. విజయవాడలోని లోతట్టు ప్రాంతాలు వరదలో మునిగిపోయే ప్రమాదం ఉందని, ప్రజలు ఎగువ ప్రాంతాలకు తరలి వెళ్లాలని ఆయన అన్నారు. ప్రభుత్వ హెచ్చరికలని ఆషామాషీగా తీసుకోవద్దని ఆయన ప్రజలను కోరారు. శ్రీశైలం బ్యాక్ వాటర్ ముప్పు పొంచి ఉందని ఆయన చెప్పారు. కర్నూలు జిల్లాలో నాలుగు, మహబూబ్ నగర్ జిల్లాలో రెండు గ్రామాలు పూర్తిగా నీట మునిగాయి. సహాయ చర్యల కోసం బెంగుళూరు నుంచి ఆరు హెలికాప్టర్లు బయలుదేరాయి.