బయటపడిన 28 మృతదేహాలు

హైదరాబాద్: కృష్ణా నదీ పరీవాహక ప్రాంతం శవాల గుట్టగా మారే ప్రమాదం ఉంది. కర్నూలు, మహబూబ్ నగర్ జిల్లాల్లో వరద మట్టం తగ్గు ముఖం పట్టడంతో శవాలు బయటపడుతున్నాయి. ఇప్పటి వరకు 28 శవాలు బయటపడ్డాయి. వరదలు ఇంకా తగ్గితే మృతుల సంఖ్య గణనీయంగా పెరిగే ప్రమాదం ఉంది. దాదాపు 70 మంది జాడ తెలియడం లేదు. మహబూబ్ నగర్ జిల్లా రాజోలీలో నాలుగు శవాలు బయటపడ్డాయి. మంత్రాలయం మఠంలో నాలుగు శవాలు బయట పడ్డాయి. అదే విధంగా నాగుల దిన్నెలో ఆరుగురి శవాలు కనిపించాయి. ఈ ఆరుగురు కూడా నాగులదిన్నె గ్రామానికి చెందినవారే.

దాదాపు 70 మంది జాడ తెలియడం లేదు. నాగులదిన్నెలో 9 మంది, మంత్రాలయంలో నలుగురు కనిపించడం లేదు. కర్నూలులో వరద తగ్గుముఖం పట్టింది. తన స్వగ్రామం రాంపూర్ లో మిద్దెపై ప్రాణాలు అరచేతి పట్టుకుని సాయం కోసం ఎదురు చూసిన స్థానిక శాసనసభ్యుడు బాలనాగిరెడ్డి, ఆయన కుటుంబ సభ్యులు సురక్షితంగా బయటపడ్డారు. కర్నూలులో చాలా వరకు వరద తగ్గింది. అయితే సాయం అందక బాధితులు తీవ్ర ఆగ్రహం వ్యక్తం చేస్తున్నారు. కర్నూలు కలెక్టర్ కార్యాలయం వద్ద వారు ఆందోళనకు దిగారు. తమకు ఏ విధమైన సాయం అందడం లేదని వారు విమర్శిస్తున్నారు.