పేలుళ్లతో గోవాలో రెడ్ అలర్ట్ ప్రకటన

పానాజీ: గోవాలో పేలుళ్లు సంభవించడంతో రెడ్ అలర్ట్ ప్రకటించారు. గోవాలోని మార్గావో పట్టణంలో స్కూటర్ పై గల పేలుడు పదార్థాలు పేలిపోవడంతో ఒక వ్యక్తి మరణిందగా, మరో వ్యక్తి తీవ్రంగా గాయపడ్డాడు. హిందూ సంస్థ ఒకటి ఈ ఘాతుకానికి పాల్పడినట్లు అనుమానిస్తున్నారు. పేలుడు పదార్థాలున్న స్కూటర్ హిందూ మత సంస్థ సనాతన్ సంస్థ సభ్యుడు నిషాద్ బఖాలేకు చెందిందని రాష్ట్ర హోం మంత్రి రవి నాయక్ చెప్పారు.

గోవాలోని పొండా ప్రాంతంలోని రామ్ నది పట్టణంలో ఆ సంస్థ కేంద్ర కార్యాలయం ఉంది. విచారణ నిమిత్తం బఖాలేను అదుపులోకి తీసుకున్నారు. సంస్థ కేంద్ర కార్యాలయంలో పోలీసులు శుక్రవారం రాత్రి సోదాలు నిర్వహించినట్లు నాయక్ చెప్పారు. హోండా ఎటెర్నో స్కూటర్ పై ప్రయాణించిన మాల్గోండి పాటిల్, యోగేష్ నాయక్ లు సనాతన్ సంస్థ సభ్యులని పోలీసులు చెప్పారు. పాటిల్ ఈ పేలుడులో మరణించగా, నాయక్ పరిస్థితి ఆందోళనకరంగా ఉంది.